祝願棉花身體健康

老公在清明節回家掃墓，順道去探棉花，他說棉花有小寶寶了，可是一天到晚在軟墊上睡覺，叔叔說牠很懶。其實棉花一向身體也不大好，生寶寶未必應付得來，祝願棉花身體健康，生出可愛活潑的小寶寶。

希望有一天我也可以回家看看棉花。

【fb文】可怕的西藥

食西藥好多時令人昏昏欲睡，但有時會有反效果，我阿婆90＋＋＋歲，身體退化加上呢幾日天氣潮濕，成日嗌頸痛。輪了街症都唔好於是用醫療券睇醫生，個醫生扣了四百幾蚊（一年好似千零蚊），可能因為收了咁多錢就做啲嘢，俾了3款藥，食了就話唔痛，但係同時變得非常亢奮，平時六點瞓到六點，呢2日見佢冇乜瞓，一日到黑周圍行不停講嘢，仆親撞到頭，將個披袋拆開話要造衫，嫌隻貓嘈將佢困入我房（平時撞聾）。。。。

被嘈醒之後摷佢啲藥出來睇，其中一隻消炎藥decflonac食咗可能會焦慮丶失眠、精神錯亂。。。！！
因為瞓得少平時揀飮擇食嘅阿婆將成個麵食晒，我希望佢食多啲將啲藥排出體外。。。不過到時又嗌痛的了。
西藥真係好可怕冇乜嘢都盡量少食。

惰性

這個周末，本來想整理一下自己的電腦和執屋，但結果還是在玩小遊戲中度過。唯一做過的，是在屋企樓下的超市買了些糧食回家。

應該好好珍惜所餘無己的舒適自由的日子，把想做的事通通做完。

星期一又要上班，回家又會很累，到時甚麼都做不了。

以此文鼓勵自己，如果明天我沒有做到，我要天天寫，寫到覺得自己也忍受不了自己為止。

偷跳的法則

年紀愈大，對於事情的批判，有時會超越道德標準。例如發現朋友偷跳，正常是覺得不應該，但是當知道事情來龍去脈，加入主觀感情之後，有時又會對偷跳者有同情或同理心。

不過講到底，可能因為「己所不欲物施於人」，我就不會鼓勵別人咁做。總而言之，偷跳的世界是孤獨的，一條獨行的路，不應該和別人分享。到一個人品味到覺得毫無意義和樂趣時，就是事情終結的時候。

我認為這是道德以外一個規範倫理最簡單的方法。

新年雜記

呢度本來係自己寫寫日記嘅地方，但係近來電腦都懶開，加上好忙返工，放工都係休息，玩玩手機，所以都好少寫。而且呢度最高點擊都係啲生活上嘅分享，咁近來又無乜特別的體驗，都少咗分享類嘅文章。

本來都有少少嘢想寫，寫到呢度又真係唔記得咗，算，下次有 mood 再寫過

返工返到眼癌咁滯，我想放工有生活。

廣州 1.5 日遊（芳村）

已經好耐無更新網誌，可能因為工作上經常要打稿失去寫網誌之趣，又可能係因為平時常用手機上網常上 fb 亦少用電腦。不過今日雖然好夜忽發雅興想寫少少。

剛過去的 weekend 去了廣州。星期五放工七點，九點左右在羅湖過關，然後買了九點八的廣深飛（79.5 rmb），遲了開車但比我想像中早到（班車十點十到佢好似十點八左右就到咗）。

自從幾年前開始次次去廣州都係住芳村珠江旁邊，今次第二次住嗰度間青年旅舍，感覺同以前差不多。然後又好鍾意吃嗰度附近啲街邊大排檔，廣州就是跟香港不同，五個半買隻雞翼個肥仔哥哥燒了成半粒鐘先燒起，又真係好鬼好食。雖然好多人可能質疑街邊嘢唔乾淨同無益，但係收你幾蚊咁有心機燒嘢食，繁忙嘅香港絕對食唔到。

除咗街邊另一樣在芳村最常做就是去茶香居飲茶。因為就嚟過年，連續兩日地下同二樓都俾大公司包咗場開年會食公司飯。而因為過年要賺盡所以我同老公第一次被安排坐三樓。泊車時發現「停車場」（其實是一塊空地）有蓋地方用厚身紅白藍包住變成「飲茶專區」，非常地盡其用。而唔知因為一二樓包場人手唔夠，定係啲勁嘅廚放咗假，啲小菜無之前食開咁好食，叫咗個廚師推介嘅金菇牛肉卷，極鹹同難食。而後來得知免費可以入會之後，申請咗張會員卡，食咗二百幾蚊嘢第日竟然可以 redeem 番 80 蚊嘅食物，非常抵。攞起張會員卡之後，又發現原來茶香居原來已經變咗鴻星茶香居……咁我又推斷啲餐牌靚咗同埋嘢食變咗冇咁好食係同佢變成咗連鎖集團成員有關。因為畢竟新年前後好難作準，唔食多次都唔知啲嘢食係咪真係今時不同往日。不過諗起獨立食肆變咗財團旗下公司，感覺又好欷歔。

其實我都幾鍾意芳村呢個地方，一來珠江旁邊風景幾好，可以買票遊河，個公園靚到開咗幾間婚紗舖，而一邊有間青年旅舍兼開咗幾間 pub，very 鬼佬 friendly，而另一邊又有大排檔可以食燒烤打邊爐，最後一個重點就係人唔多消費亦好平，係一個廣州市入面令我印象深刻又幾有感情嘅地方。

釋放負能量

呢排負能量好高，為咗健康我決定在此釋放一啲，不喜勿看。

．上一篇 post ，好驚會變 post of the year，在我的生活中勁 loop……（已有最少三個 target）
．又買 iPhone ，又係無乜開心嘅感覺，一來好貴，二來部機同上一代勁似，三來又係因為工業用因素而揀佢，充滿無奈感
．返咗新工三個月多少少，強烈感受到做 digital 工作機會多過做書好多，但係份工亦唔穩陣好多（雖然朋友曾經做紙媒都好唔穩陣）
．又係工作，做咗網站愈來愈少機會寫長稿，我懷疑我無長稿寫無訪問做會抑鬱
．雖然我識做好多嘢，但係更多嘢係唔識做。但係 most of all 最賴嘢係樣樣識少少，但係無話無咗我唔得
．老公養唔起我令我對生活非常擔憂
．我對錢嘅敏感度低令我理財能力好低，「跌」好多錢，但其實我好需要錢

眼前嘅嘢已經夠衰，未來嘅不可知已經唔到我擔心，不過我相信今年點都好過舊年，最緊要係平安同埋健康。

買你怕

通常我都好少仇口，好少同人交惡，自問底線好低。

如果我憎你，我直情會買你怕，驚咗你。如果有個人俾我呢種懼怕嘅感覺，經驗話俾我知係冇可能番轉頭。

唔好再走出嚟嚇我。

2014

2013 年終於都完了。我想很多最好和最壞的事情都在這年發生了。有些事是那麼垂手可得，但是令人感到無能為力的事情就更多。

其實我覺得盡力做一件事並不是我的風格。我覺得如果要出盡力才達到目的的話，那些事情或後果並不是自己應得的，或者這令到很多人認為我這種態度不夠進取，我想每天唯一可以做的事就是做好自己，那已經很足夠了。

還有一件事就是我經常都揀容易的事來做，不熟識的範疇的事很多時都被擱在一旁，這令我的生活形成很多缺憾。

2014 年除了懂得選擇之外，亦要坐言起行，希望那些不幸的事情會遠離我而去，今年過得比去年好。

懺悔文

我覺得我做野都算快手，但係容易分心程度係正常人二倍以上。

其實咁我都可以存在世上的，但係就少左好多人生樂趣。

不過現階段的我，瞓覺係非常重要。

晚安。

錢作怪

當老公一日到黑話要賺$的時候，我也一日到黑發窮惡，跟住家裡好多事情令我看不過眼。本來心入面已經唔舒服，當我臨瞓想煲兩隻蛋食時，發現蛋架入面有幾隻裂了的蛋，阿媽都唔捨得掉。。。。

其實我都無能力令阿媽對生活安心，仲食緊佢住嘅飯。講到尾唔係乾塘所以熬底，而係對未來無信心所以恐懼。

開心過日子真係唔易。

【fb 貼文】金山阿伯客串楂的士

今朝我晏左起身返工，諗住等過海的啦，點知個的士站半架的士都無（平時起碼有三架），正當我灰到爆之際，大路上突然有個的士阿伯向我揮手，於是我就上左佢車。上車我話要去壹傳媒大樓，佢話唔識，我都無為意，因為 d 司機通常都話唔識去，咁我話好啦去到我點你，講多兩句佢就講維基，入左東隧，到出隧道佢就轉話題，表明自己金山阿伯身份，佢話佢移左民加拿大，得閒返下香港，咁啱佢兩架的士司機去左泰國旅行，佢唔抵得架車停係度無人楂所以楂出來兜下，仲不只一次強調自己好耐無去過將軍澳，此時我有少少懷疑佢有機會唔識路，但一陣之後佢就上左將軍澳公路，之後條路就直去，咁我就知無機會行錯路了。

此時阿伯囉左一本相簿出來，係佢加國生活私相簿，佢話自己 96 97 時用百幾萬港紙買左間 house，有兩三層有前後花園o個d，我話係咪村屋咁，佢話靚好多，我又話咁係咪山頂 d 豪宅咁，佢話梗係靚過 d 豪宅。之後睇到佢相簿有一對仔女同埋佢同個孫的生活照，佢又認叻話：「呢個我內孫黎，佢好得意好叻仔架。」我心諗個個都話 d bb 都叻到曉飛架啦，又話最近帶左孫仔去唔知邊度旅行（我港女唔識），跟住講下講下佢有少少失落，佢話：「不過個邊好悶架，無乜朋友，可能 d 人要搵食啦，就算去唐人街，d 老闆都要自己落手落腳做野，無人得閒同我傾閒偈囉。」

此時架車開始駛到去邵氏片場，佢話呢度係咪電視城，我話唔係 tvb 黎架，邵氏片場啊，跟住佢見到片場個 logo 就認得。跟住架車去到日出康城，佢好似發現新大陸咁：「嘩呢個屋苑好大！以前都唔見有既！」我話呢度好近堆填區架，麻麻地，補多句：你一陣打開度門三秒就聞到。

跟住過左一陣就到左目的地了。呢個唔識路的士司機都幾勁，行過 d 路講到前所未見咁，結果都無行錯路。落車時我話祝你生活愉快，佢可能覺得我咁好傾，回返我一句，話祝我未來生活俾佢更好。知後我就落車了。

金山阿伯都幾 proud of 佢自己o既生活，可能當佢係屋企悶到發霉個一刻，都有懷疑過自己係咪移錯民。不過睇到香港依家咁，佢心入面都應該慶幸自己執返身采啦。

有些人應該不相往還

前天不知是下晝還是夜晚做了個夢，夢入面一個我不想見到的人打電話來問候，寒喧了幾句才發現是誰（因為夢通常警覺性低），然後匆匆掛線。

其實我是一個很有同理心的人，就算我唔鍾意一個人，都會覺得大家是站在不同立場做自己認為啱的事，很難真心討厭一個人，如果我真心覺得一個人乞人憎（不是因為驚或者逃避），那就應該跟隨自己的感覺去吧。因為人生不能盡如人意的事太多太多了，為何在一些小事上面為難自己？

如果這個人看到，希望他識趣，不要再訂閱了，瀟灑地華麗轉身吧。

留文字

近來比較忙加上用手機比較多所以好少上網打字寫 blog，近況就唔使講喇，一個字「累」，希望我快 d 適應我新工業區 OL 生涯啦！