工作實況透視

由於金融海嘯關係，近來的業內活動非常之少，另一方面亦到了聖誕節的工作旺季，公司生意不俗，因此大部份時間留在office埋頭苦幹，在這裡為大家報道一下我的工作實況：


業餘攝影師森遜．李果然有料到，一鏡過拍到三位女同事（左起a小姐、f小姐及h小姐）


森遜．李貫徹影女作風，拍攝到程式員錢小姐工作情況。錢小姐工作中亦不忘途上手霜。



錢小姐在公司公然兼職賣魚。


森遜．李的自拍（對面的人是我:p）


另一邊箱，我在Mr. Fun資助下，入手了大批零食！~


呈現出一片澎湃景象！當中包括了極名貴的低糖版樂家杏仁糖（右下）！


自從飯腳送左筒糖比我之後，發現大家對橡皮糖的興趣甚大，這次一次過入手了4筒！忙亂之間買了一筒錯體黑加侖子糖，好在成功換番筒正常版！:p

* * * *

近日我非常之不正常，今日終於把事情解決了。但是今朝又突然發噩夢驚醒，還是要點時間調整一下自己 -.- 希望我的生活快點納入正軌。我要強調我不是扮慘，我很好的，最差的時間過去了。對於生活中的點滴，每天都要存有感激！ :>

好久不見的人們

星期日去了舊同事Anna的婚宴，她算是我第一份full time job的第一個同事，所以是一件很有意思的事。婚宴結束後我們一幫人去了附近的ktv。多年沒見，大家多年的經歷不同、鍾意唱的歌不同，但仍然記得的是當年在「地獄」生活的日子。

現在回頭一看，「地獄」還算不算「地獄」呢？真的很難說。看看自己blogspot的links→，除了雜誌a的前同事外，大部份都是「地獄」裡的子民 :p

工作辛苦，可以讓我們事隔經年仍然記憶猶新，或者在百病纏身時怨恨連連。我想唯一的得著就是多了一班共渡「患難」的朋友~

十五十六十七

呢幾日先醒起母校的張老師邀稿的事件，於是返屋企瞓左一陣又o係度寫，寫到天光都係得o個一百字。岩岩又諗起臨放工frank叫我聽下呢隻歌……


李蘊妺妹o既《十五十六十七》，請 留 意 歌 詞 ！

e家咪寫緊十七歲回憶錄囉，諗下以前自己十七歲做乜，e家十七歲o既李蘊妺妹做緊乜……

寫稿無數o既我，今次竟然被難倒。

張老師，你一定要等我！+_+

Picture Diary

相機隨行的第一天，同大家分享我今日的生活！~（所有相都係tune左色的）




以上兩張都係攝於東區走廊~


近來好多時都係4眼look見人（攝於港島東中心笠入面，有d cyberport feel……）


5點幾，又係港島東中心37樓「轉笠位」，對面係飛鵝山，唔夠光+煙霞，d色點tune都怪……


呢張係「獅子山下」！:p


今日成9點先放工，食左碗「潮城魚蛋米」，久違了的味道！~ 近來吃過的魚蛋，如灣仔潮苑 & 勁出名的筲箕灣利安，d魚蛋都落左太多胡椒粉，令魚蛋無晒魚味，潮城o既魚蛋就無呢個情況！~ 另一推介係登龍街附近o既江仔記:P :P :P

最好的心情

近排我有些心事，個blog可能多o左負能量post。有時都不好意思，大家黎睇我o既blog可能都係抱住輕鬆o既心情，但這些負能量的事，讓大家聽來聽去可能覺得比我更懨悶，那就更加不好意思。

讀書時代，好心情是用不盡的，到了出來做事，就覺得好心情可貴──好心情用來培養工作的情緒、運動是為了身體健康，其他的吃喝玩樂就是奢侈的生活調劑品。然後，起碼有3分1的朋友結婚了，玩伴愈來愈少（fewer, younger）了，那就是「步入中年」的signal。突想起松山那句：中年心事濃如酒。

所有的事都很functional，所以寫散文、小說，這些tasks，對我來說愈來愈難了，因為現在只懂寫產品介紹和日記，反而少了一點感性一點的個人風格。

說到尾其實是「取捨」，唔開心都係因為貪心。

試機相~

paul哥提起我先醒起自己應該試一試部機，試開先發現原來佢跟機「送」畀我的咭過不到相 -.-，好在我自己死剩一張咭，可以試下部機的質素。客觀黎講都係一分錢一分貨，但呢部機的價錢同外型都為佢贏返不少分數，整體我都覺得okay o既~

以下相片係manual mode + vivid color + 白平衡set做鎂光燈 + 花花近攝 + iso自動摸式拍攝（我一貫o既拍攝手法）~

執相前~ 少少藍藍地的感覺


執相後~ 幾好，之前那部影出黎的相成日覺得tune鮮色之後張相黃左，呢部整理後感覺不會太「黃」。


執相前~ 好似成張有d淡色。


執相後~ 都幾靚，d色好似假得黎幾有日本feel。


執相前~ 經常出現的情況，部機個影令到影出黎一片黑影。


執相後~ tune番光，都ok，可能部機輕所以較常出現「手震」，但咁暗都出到色我覺得都幾滿意。


執相前~ 始終都係夜晚，又係唔知想點的一張相……


執相後~ tune左色之後醒目左，但都係克服不到手震問題，要避重就輕同埋多d練習~

佢送畀我的sd 咭（加錢轉左4mb）過不到相……好事多磨，激死人喇 >_<）

插爆

容許我o係度輕微發放我的負能量：

前日用左1.5年o既相機（IXUS 850 IS）張SD咭爆裂，之後插唔倒咭入去，諗住囉去canon維修中心度搞搞佢，點知維修中心個妹妹仔話部機個插咭槽甩o左零件，即時報價的維修費用是HK$544（行貨優惠價），而此機已discon，街賣的官方價是HK$1,780（我買的時候是24xx）。妹妹仔仲話「除非部機好有紀念價值，如果唔係都唔建議你整番」，咁都講得出證明整番部機係好唔抵。而且一時之間又諗左以下3個點：

．囉去比市面的人整又要再報價，又唔知幾時先整番好，無機用係一件苦事；
．之前部機都係claim保險claim番黎，阿Q d諗其實都算賺o左，就由得佢死左佢算；
．佢去過九寨溝唔老黎（唔係因為四川地震）。

把心一橫搭車落旺角秋葉原，諗住去執番部under HK$2k的相機。因為上部機係畀人搶走，呢部機係岩岩過左一年保養就壞，部部都英年早逝。其實諗深一層應該係我差不多日日用，佢耗損得太犀利先會咁快壞掉……總之我認為買咁貴係side氣，夠用就算。（成個mission都係灰到爆）

去到旺角撞岩自稱「於西菜區巡視業務」的肥強，叫佢幫下眼睇下d機。行o左幾間之後結果我買左尼康coolpix s210（黑色），盛惠HK$1,550。


原來仲有藍色同埋粉紅色（kawaii），不過黑色都好靚~

我上一部尼康dc已經係六、七年前o既coolpix775，另一部擁有o既尼康相機係D70。其實揀尼康相機都有度好，就係佢維修中心o係我屋企隔離，行5分鐘就到 :p（我當然唔希望佢需要維修啦……）

希望我同呢位新朋友相處愉快，忘記之前兩部機的慘淡回憶 -.-

古惑的士

尋日朝頭早坐巴士返工，途經東區走廊時影左呢張相：


close up睇睇：


影完呢張相之後，我張咭無幾耐就粉碎左，呢張係我用張toshiba sd咭影o既最後一張相…… -.-

Polyvision給消委會的回覆

前日收到一封信，係Polyvision畀消委會的回覆，由消委會複本一份畀我。我去退款那日佢不厭其煩咁問我有咩不滿，表現得十分體諒我o既想法，就係為左寫呢封信。

我再重申我戴o左廿幾年眼鏡都未試過配o左副眼鏡番o黎睇野唔清楚（佢total換左2次，都睇唔清），廿幾年黎一次都未試過要求換鏡片。佢係封信度話換鏡片只肯換一隻係因為「一隻眼睇近，另一隻保留睇遠既視力」（o個隻眼其實係弱視，唔知點保留遠的視力呢……），同埋最後話我「適應唔到副眼鏡」，令我覺得更嬲。



其實我仲未配番副新眼鏡，依家有80%時間都係戴住舊眼鏡或瞓覺，20%時間戴con。真係諗唔到想配副眼鏡都咁難-.-。

20年

今日下午Meling share了一個blogspot的網站給我，come back to love，裡面放了很多80s的歌。


這首1988年的歌，不經不覺20年了。不知從何時開始，每當聽到這首歌的intro已經深深的感動~

在我很喜歡Beyond的年代，家駒已經死了。雖然現在勉強來說，Beyond仍然存在，但現在的我，覺得我喜歡的Beyond已經死了，正如我心中的軟硬已經死了一樣（家下的軟硬真係好惡頂）。不過這世界，就是失去了的才會覺得美好。



扮晒斯文的Beyond也是我杯茶~ 像歌詞所講一樣，留戀昨日其實沒啥意思。



呢隻係最lastest覺得正o既，好明顯我係like steve > paul :p。

願我們都懂得珍惜現在擁有的。

內有惡貓

今日在北角經過一間二手書店，店內無人，但保守估計起碼有六、七隻貓……


O晒嘴……


睇到d咁「不厭其煩」o既notice，真係有d驚……

最想念的季節

尋日唱k 唱了張含韻的蒙牛酸奶廣告歌，今日番聽了她的一些歌s，聽到這一首，是她第一張專輯裡的《最想念的季節》。那年（2005）冬天我還在雜誌e工作，一個人坐火車去了北京，逗留了一星期也沒有下雪，離開北京之後第一個站，就有雪粒飄下來了，應該就是入冬以後第一場雪喇！~

忽然很懷念那時候的心情~

耿耿於懷 II

又一件耿耿於懷的事。其實這件事比起之前提起那件事更耿耿於懷，就係尋日無啦啦有人問候我個ex究竟去左邊，其實一路都沒聯繫也沒有特別的好奇心想知道。點知第朝（即係今日）又想起這事，於是求諸「阿苦」，「阿苦」顯示了幾個搜尋結果，最近那個是今年年頭他寫的一篇文章，裡面貼了一張他的照片（我沒有放大來睇）。

通常d人睇完佢d相第一件事就係問佢係咪大我好多，其實唔係囉。Mr. ex的其中一句金句是「求求其其整幾皮」，當然那幾皮不是求求其其整番黎，所以個人睇落滄桑d…… 雖然話得耿耿於懷，但都希望他生活愉快，工作順利。

+ + +

見識過「阿苦」的威力之後，我又有點意猶未盡，打自己個名入去，睇下有咩出現。可能我個名特別中有d普通，通常除左見到「真正o既自己」之外，都會見到第d野，例如之前就見過一個婆婆的網上靈位……-,- 今次見到一樣新野（前日post出來，新鮮滾熱辣），大家有興趣的話自己睇睇呢度。

我要澄清我沒有秘密產子 :p 又一個地球上的另一個我，睇個網呢個人應該係香港女子呢 :p x 2

耿耿於懷

尋日回家即時補眠了一會，夜晚很夜才睡，撞見朋友仔在網上做功課，談了幾句，他所說的令我很耿耿於懷（經修改後節錄）：

我說：30歲 + -的女人很容易心急，拍錯拖、結錯婚、生錯仔（下刪一百字）
他說：可能錯有錯著呢……

唔知點解佢咁講我真係好嬲。如果我做錯事，別人說這句話安慰我，我覺得可以接受，甚至可能覺得很窩心。但至少「錯有錯著」對我來講是一個勁錯的想法。

可能我太嬲同齡的男生對於這種事情竟然一點同理心都沒有，又或者單純因為太耐無見，大家sync唔倒 -.-

修剪兔毛

昨天晚上我為兔子清潔和修剪毛髮。圖片中大家可以看到兔子的居住環境，我家之前養的兔兔，很多時都會被籠底的支架弄傷手腳，因此近年改用了這種布置，在兔居的地上舖上木糠，感覺比較舒適，但這樣一來卻帶來麻煩──兔尾巴經常黏著一團「毛 + 木糠 + 便便」的東西，size比尾巴還要大-,-。

今個夏天，我為兔沖了兩、三次澡，每次都因為兔子受驚反抗，釀成流血事件（當然不是我流血 =.=）。堅強的兔並沒有因為沖涼而嚇死（聽聞兔很細膽，某女性雜誌高層的公子就曾涉嫌嚇死了一隻兔 :p），但近日天氣漸涼，洗澡會很易著涼。

前幾天我買了濕紙巾，為兔兔清潔便便，昨天試圖為兔兔清潔，但發現「毛 + 木糠 + 便便團」（今後簡稱「便團」好了-.-）實在非常頑強，於是抱著牠強行把毛團剪掉。期間我的外祖母在旁極力阻止，話會剪倒佢，但最後我還是成功了！~

為了安撫兔的心靈，我還抱了牠一會。兔雖然沒有狗狗那麼聰明，但不像其他動物般反抗人類，抱牠的時候牠就乖乖睡作一團！~


逃避鏡頭


「搞咩啊你！~」（設計對白）


神氣的兔（牠是女仔來的）

我經常強調這兔不是我養的，不是因為我沒愛心，也是有原因的。十幾廿年前我做了一件錯事，就是在朋友家後巷拾了一隻兔回家（朋友住炮台山，當年不知用甚麼方法「連籠帶兔」帶回家……），之後我沒有心機養牠，由愛心爆崩的母親代為照顧小兔直至終老，此後便再沒有帶 / 買動物回家。

在我的世界裡，愛護動物還是雖要一點責任心，自問沒有這麼偉大的我，相信今生今世也不會再養動物……

p.s. 希望「星嫂」不要再鬧我虐待動物 -.- ：你睇佢幾開心！