呢件事好fragmented，好難三言兩語講出o黎，但我真係好想講。趁今日係星期日，o岩o岩瞓夠瞓醒，我即管試下用我o既言文能力組織一下。
尋晚食飯，踏出食肆的一剎那，我爆粗了。
尋日約o左同事r行街，佢好想食壽司，於是去o左禮頓道一壽司，一坐低，二分鐘唔到，就certify自己「賴o野」
首先睇睇呢幅圖。件事就係咁o既，我同r被編排坐係呢對男女o既隔籬，個女的似乎同佢男友剛剛分手，需要呢位男士聽佢傾訴。呢位妙齡女子應該係25以下，中大畢業，靚，個樣勁似
crystal wan，而個男人應該係30+，四眼、髮線上升、鬚根。頭兩樣都可以係先天，但第三樣一定係放棄自己外表而形成。
你諗下，一個crystal wan咁o既樣o既女仔，點會鐘意一個咁樣o既男人，但係，佢失戀，要人聽佢講o野。
我食o左成粒鐘都唔見佢食o野，因為佢好需要講o野，而佢個故事，係要由中一開始講！！！佢有一班由細識到大o既姊妹，其中三個同時鍾意一個男仔。有個男仔追唔到佢，同o左佢個fd一齊。坐我隔籬個男人話
「食唔到翅，雞都食住先」……你想讚你對面個女人係翅，定係想講，咁靚o既翅，結果都係畀人食呢？！
個女仔講關於佢個fd（可能又係溝o左佢條仔），個男人即刻答佢話佢似大你好多，唔靚。個女仔即刻話個fd其實細佢兩年，個男人即刻勁讚佢，話個女仔似佢家姐多d！！！
為o左畀個位呢位男士入，個女仔又講o左個故事，話佢之前個男仔唔靚仔、唔鍾意，仲覺得佢好煩。但係個男仔好有心機追佢，佢地成日成班人一齊玩，最後，佢畀呢個男仔o既誠意感動，於是，佢地兩個未試過單獨約會，就一齊o左。坐我隔籬那男人覺得從未聽過，好有趣，好好笑！係
我隔籬大笑！我心諗，追佢唔使單獨約會o架，你約到佢食飯，咪代表你無行囉！
跟住，個女仔去o左廁所，個男人係度check e-mail，佢同個女仔講：haha，我收到個e-mail，你睇幾好笑！究竟有咩咁好笑呢，原來係佢個同事請人，而個candidate係唔o岩間公司o既，於是就寫o左封e-mail follow up返，想公司請佢，畀個e-mail個女仔睇：「你睇佢咁寫，你睇佢幾厚面皮！哈哈！我公司一定要請佢o架咩？！我覺得好好笑，哈哈哈！」
人浮於事，有乜咁好笑呢？冷笑話之極點！佢話覺得公司d hr好煩，e家請d人一定要master畢業……知你公司勁喇，唉。
跟住個女仔答佢話，有個friend讀master畢業，入o左Big 4做account，佢覺得個friend唔係讀account，但係入o左Big 4好神奇。我心諗Big 4由頭到尾都唔係齋請account畢業的人o架啦，佢咁講顯得佢好無知！
個女仔，係咁講佢d女性朋友的是非，令到個男人有機會讚佢靚、高質過佢d fd……「你個fd唔化妝一定唔見得人，我覺得你唔化妝都好ok！」，我覺得個女仔心地都好有問題，無怪乎佢都只能成為呢個男人心目中o既翅！！結果我都忍o左成個鐘食完餐飯埋單，佢地仲繼續講。
好惡頂！個女仔都係一時失戀，畀個機會呢名狗公（sorry我想不到另一個詞語）陪佢食飯……但點解佢會容許呢個男人對佢有幻想？我完全唔相信呢個女仔會畀機會個男人，食餐飯，係恩典。r話，個女的明玩個男，點解佢容許呢個男人對佢有幻想？點解港男港女咁鍾意玩mind game？
睇唔過眼，不能言語。只可以講，自己做唔出o既事，大把人做得出。無怪乎r成日講：我要做壞女人。執意做好人，好似命中註定戰死情場。但我相信，畀你壞到底，都唔會真正開心。
寫得好fragmented，見諒，多謝你睇到尾。
