記深圳地鐵飛站

facebook 已經好耐無政治洗版了。本來唔想提呢件事，但係 fb 睇見 d 人話唔怕洗腦又不吐不快，都要記低。過咗落馬洲 / 羅湖，即使係深圳都好得人驚。

上星期返深圳飲飲食食，第一站想去科學館，點知落車去咗華強北，於是想搭倒頭車返轉頭，點知聽到廣播話個站封咗。

其實我d pth 都唔係咁好，唔知頭唔知路於是在地鐵站閘口問個警察咩事，佢話科學館站封咗，問佢咩事佢又唔答！！！！！問佢幾時開站，佢又話可能晏 d………無辦法之下，於是華強北都出站啦，死死氣行去科學館，行上天橋見到一堆人（唔係好多幾百個）在馬路中心遊行，但係成條大馬路兩邊封晒！？！嘩乜大陸可以遊行，仲會封晒成條馬路？港燦真是見識少了！

之後在街上問路，途人話全日科學館同老街都封站，d 消息仲準過警察（友人話警察職能是封鎖消息）結果當日成日都無搭地鐵，做咗豪客勁搭的士。

唸起都好嬲，點解o個少少人遊行要搞到戒嚴咁款？點解地鐵會飛站咁包閉？算啦我唔會明架喇。亦都唔想明。

其實內地有潛規則，作為遊客是可以接受的，但想到今日深圳，明日香港，心裡就不寒而慄。其實人係適者生存，即使香港變到大陸咁，我都唔會因為咁而死的，我相信。但係唔想咁囉……其實中國人、外國人，都有「落葉歸根」，就係無論去到世界任何一個地方，百年歸老時都想返去自己熟識的故鄉，但係我地呢度已經唔可以再好似以前咁喇。每次唸起都真心會眼濕濕的，唉。