「港版奶粉」的價值

最容易接觸到奶粉廣告嘅地方，係地鐵同電視。呢排成日見到啲奶粉廣告有「配方專為香港BB而設」、「香港最受歡迎奶粉品牌」，我睇 / 聽後覺得極不順耳，原因係「你喺香港賣繁體字廣東話廣告，個廣告訊息明明不是俾香港人睇的，XXXX」

近排老公長居深圳，識咗好多當地生活的外省人。前幾日同佢個friend Z先生打邊爐，Z話帶一罐奶粉賺50蚊，我（心入面）當堂嘩一聲。記得買結婚戒指時（約一年半前）金至尊個sales話佢帶 0 號（孕婦奶粉）過羅湖，一罐賺 8 蚊。我當時覺得佢身為香港人出賣香港，為 8 蚊，將港版奶粉運出境，令到幾多香港人買唔到奶粉，實在太過份。但係另一邊箱，一年前聽到嘅 8 蚊，比起前日聽到嘅 50蚊，實在差得很遠。依家諗番轉頭，佢個價 8 蚊，可能因為 0 號奶粉其實可有可無，而可能當時未出限奶令，港版奶粉在內地供應充足，所以他只能賺到水腳錢 8 蚊咁大把。

我買一罐奶粉先 $293，帶一罐奶粉可以賺 $50，開頭聽落有啲不可思議，於是我襟計數機，一罐近三嚿水的奶粉，折合人民幣只係 $231（今日兌換價），如果罐奶粉以人仔 $293蚊出售，個差價已有 HK$79！也唔怪得上水火車站門口咁多人螞蟻搬家當返工了。

以我所知，內地最受歡迎的「港版奶粉」（如惠氏金裝），其實是有陸版的，之不過內地人覺得「港版有保障」，「在香港不會買到假貨」，所以才對港版奶粉趨之若鶩，這是誰造成己不用再多加說明了。既然港版與陸版是同一公司出品，來源、質量都相差不遠（理論上係），如果全世界仆去香港買港版的話，供應商只要 reallocate 啲貨量，放多啲奶粉在香港，咁就不會影響到香港阿媽買奶粉俾阿仔食了。之前咁多阿媽嘈買不到奶粉，只係因為供應商對於港版奶粉突然受歡迎來不及反應罷了。其實自從阿仔出世後，除了屋企附近間屈臣氏搬舖嗰幾日，我未試過遇到買奶粉的問題。

再望番啲廣告，其實生產商嘅語言暗示更見明顯，呢啲繁體字港鐵站廣告，其實是寫給來港旅行、入貨的內地人睇的。香港今日的田地，除了因為政府唔主動採取政策保障本地居民之外，亦因為外國人也爭相在香港這片土地上，向人民幣跪低。無論任何國籍，人生在世其實很少會同錢作對的，就係咁簡單。

「自製」detox water

前排好興detox water，好多人整嚟飲放上網，呢排已冇人咁做。前幾日阿媽買了個雜果涼粉，因為太飽冇即日食，第二日食了，但發現西瓜索了涼粉水味道少少怪，但已吃了三分二…

食完怪味涼粉翌日去廁所非常暢順，沒有肚瀉，可能detox water都係呢個原理。平時我哋咁驚食過期嘢，咁驚食壞人，其實可能不必。（網上圖片）

【發窮惡】窮也樂呵呵 森川弘子

有一排真係覺得自己好窮。人工就唔好提，以我同屋企人嘅收入根本係無可能喺香港買樓自住，一諗起呢種貧窮生活自己都覺得好灰。但係喺啲social media度又好難咁講，因為「表面風光」先係social 之道。事實上我真係覺得自己真係非一般的窮人。

呢本書係書展期間喺大陸出版社booth度買，老老實實我呢兩、三年真係幾乎完全無睇字書，睇嘅都係圖文書，而且好多都係大陸版，因為平啲。不過我都有買港版，不過都係因為大陸未出或者無那本書。其實依家我買嘅多數都係大陸嘅日文譯本圖文書，另外就有買香港本地圖文書與本地流行作家嘅散文集。

講番本書，買咗真係無時間睇。咁啱今日放假就一氣呵成睇晒。本書講個作者為頭家點慳家，睇完真係覺得自己雖然有時都幾慳但真係唔夠佢慳，本書原名係叫《150萬年收入家庭的生活》150萬yen嘅年薪即係港紙 10萬，喺日本紙水咁高，一家三口年食 10 萬真係好得人驚，而且日本人咁要面，你一家人年薪十萬仲要話俾人知，又會唔怕無面，都幾「另類」……亦可想而知日本依家幾經濟不景。

睇完本書我覺得自己都唔算好慳，唔算好窮，除此以外，作者從「慳得一蚊得一蚊」中得到嘅快樂又真係好有感染力，令到人睇到本書之後會覺得，其實窮都可以自找樂子，非常正能量！書入面最感動就係佢講自己成日參加抽獎，有一次抽到隻長腳蟹，咁佢同老公好開心咁分兩餐食咗，食完啲殼仲留番來加蟹柳煲粥俾阿囡食（佢話阿囡太細（應該未夠一歲）唔食得蟹，所以唔俾佢食蟹肉……），最後佢補多一句話「希望阿囡大個之後，有能力自己買蟹食。」真係睇到眼濕濕。

另外書嘅其中一個單元係講作者好鍾意去旅行，去過歐洲亞洲好多地方，阿囡出世之後仲一家三口去 Paris，洗咗 40 萬yen，即係全年家庭收入嘅三分一！真係好捨得！仲話要趁阿囡兩歲要俾機票錢之前去多啲旅行，雖然窮都咁有 passion 放眼世界，我真係要俾個服字！

作為一本正能量嘅消閒書，呢本書真係幾好睇。不過書入面有啲位我有懷疑佢譯得唔係幾好，例如作者買二手衫，一件「十蚊日幣」、一對BB鞋仔「五十蚊日幣」，我懷疑其實係佢本書翻譯時搵咗一堆人一齊譯，銀碼上有些譯者係跟番日幣有些係人民幣，形成一片混亂，校對的編輯未盡其責將之修改。我相信如果佢買件衫真係10蚊日幣（約人民幣五毛）咁不如唔好收攞。

窮也樂呵呵   森川弘子 RMB 28

目光放遠

中秋假之前我日日告訴自己要換床單，結果假期裡我什麼都沒做，床單在我睡前15分鐘換了。

目標放遠點就是這原因。

聖羅蘭 Yves Saint Laurent

PR送飛，一個人去咗睇聖羅蘭。其實我好少一個人去睇戲，對上一次已經係《失憶界刂女王》，喺太古城UA（11年前！！！）。今次睇戲其實都係當課外閱讀，溫故知新。

入院前預咗會悶悶地，的而且確，成套戲就係由羅蘭先生入行，講到佢死順序進行，不過對於羅蘭幾乎一無所知（剩係知佢係法蘭西人同死咗）的我來說，此片都算極有參考價值。由於要respect番片中兩位男主人公，我相信呢套戲好大程度上對佢哋美化咗、修飾咗，但亦都無損佢呈現史實。

睇完戲撞到 ex 公司營業部同事，佢同老婆一齊睇，之後隨口問我去咗邊度做。佢走咗之後我醒起佢都好似轉咗工（？又好似唔係）anyway，我都係打工嘅材料，事實證明，我好難做自由人（雖然未做過，但事實），所以還是俾心機繼續打工吧。

推介俾：鍾意時裝但唔係好熟聖羅蘭的人
唔啱睇：想睇靚仔、靚衫、所有搭錯線的人

祝願棉花身體健康

老公在清明節回家掃墓，順道去探棉花，他說棉花有小寶寶了，可是一天到晚在軟墊上睡覺，叔叔說牠很懶。其實棉花一向身體也不大好，生寶寶未必應付得來，祝願棉花身體健康，生出可愛活潑的小寶寶。

希望有一天我也可以回家看看棉花。

【fb文】可怕的西藥

食西藥好多時令人昏昏欲睡，但有時會有反效果，我阿婆90＋＋＋歲，身體退化加上呢幾日天氣潮濕，成日嗌頸痛。輪了街症都唔好於是用醫療券睇醫生，個醫生扣了四百幾蚊（一年好似千零蚊），可能因為收了咁多錢就做啲嘢，俾了3款藥，食了就話唔痛，但係同時變得非常亢奮，平時六點瞓到六點，呢2日見佢冇乜瞓，一日到黑周圍行不停講嘢，仆親撞到頭，將個披袋拆開話要造衫，嫌隻貓嘈將佢困入我房（平時撞聾）。。。。

被嘈醒之後摷佢啲藥出來睇，其中一隻消炎藥decflonac食咗可能會焦慮丶失眠、精神錯亂。。。！！
因為瞓得少平時揀飮擇食嘅阿婆將成個麵食晒，我希望佢食多啲將啲藥排出體外。。。不過到時又嗌痛的了。
西藥真係好可怕冇乜嘢都盡量少食。

惰性

這個周末，本來想整理一下自己的電腦和執屋，但結果還是在玩小遊戲中度過。唯一做過的，是在屋企樓下的超市買了些糧食回家。

應該好好珍惜所餘無己的舒適自由的日子，把想做的事通通做完。

星期一又要上班，回家又會很累，到時甚麼都做不了。

以此文鼓勵自己，如果明天我沒有做到，我要天天寫，寫到覺得自己也忍受不了自己為止。

偷跳的法則

年紀愈大，對於事情的批判，有時會超越道德標準。例如發現朋友偷跳，正常是覺得不應該，但是當知道事情來龍去脈，加入主觀感情之後，有時又會對偷跳者有同情或同理心。

不過講到底，可能因為「己所不欲物施於人」，我就不會鼓勵別人咁做。總而言之，偷跳的世界是孤獨的，一條獨行的路，不應該和別人分享。到一個人品味到覺得毫無意義和樂趣時，就是事情終結的時候。

我認為這是道德以外一個規範倫理最簡單的方法。

新年雜記

呢度本來係自己寫寫日記嘅地方，但係近來電腦都懶開，加上好忙返工，放工都係休息，玩玩手機，所以都好少寫。而且呢度最高點擊都係啲生活上嘅分享，咁近來又無乜特別的體驗，都少咗分享類嘅文章。

本來都有少少嘢想寫，寫到呢度又真係唔記得咗，算，下次有 mood 再寫過

返工返到眼癌咁滯，我想放工有生活。

廣州 1.5 日遊（芳村）

已經好耐無更新網誌，可能因為工作上經常要打稿失去寫網誌之趣，又可能係因為平時常用手機上網常上 fb 亦少用電腦。不過今日雖然好夜忽發雅興想寫少少。

剛過去的 weekend 去了廣州。星期五放工七點，九點左右在羅湖過關，然後買了九點八的廣深飛（79.5 rmb），遲了開車但比我想像中早到（班車十點十到佢好似十點八左右就到咗）。

自從幾年前開始次次去廣州都係住芳村珠江旁邊，今次第二次住嗰度間青年旅舍，感覺同以前差不多。然後又好鍾意吃嗰度附近啲街邊大排檔，廣州就是跟香港不同，五個半買隻雞翼個肥仔哥哥燒了成半粒鐘先燒起，又真係好鬼好食。雖然好多人可能質疑街邊嘢唔乾淨同無益，但係收你幾蚊咁有心機燒嘢食，繁忙嘅香港絕對食唔到。

除咗街邊另一樣在芳村最常做就是去茶香居飲茶。因為就嚟過年，連續兩日地下同二樓都俾大公司包咗場開年會食公司飯。而因為過年要賺盡所以我同老公第一次被安排坐三樓。泊車時發現「停車場」（其實是一塊空地）有蓋地方用厚身紅白藍包住變成「飲茶專區」，非常地盡其用。而唔知因為一二樓包場人手唔夠，定係啲勁嘅廚放咗假，啲小菜無之前食開咁好食，叫咗個廚師推介嘅金菇牛肉卷，極鹹同難食。而後來得知免費可以入會之後，申請咗張會員卡，食咗二百幾蚊嘢第日竟然可以 redeem 番 80 蚊嘅食物，非常抵。攞起張會員卡之後，又發現原來茶香居原來已經變咗鴻星茶香居……咁我又推斷啲餐牌靚咗同埋嘢食變咗冇咁好食係同佢變成咗連鎖集團成員有關。因為畢竟新年前後好難作準，唔食多次都唔知啲嘢食係咪真係今時不同往日。不過諗起獨立食肆變咗財團旗下公司，感覺又好欷歔。

其實我都幾鍾意芳村呢個地方，一來珠江旁邊風景幾好，可以買票遊河，個公園靚到開咗幾間婚紗舖，而一邊有間青年旅舍兼開咗幾間 pub，very 鬼佬 friendly，而另一邊又有大排檔可以食燒烤打邊爐，最後一個重點就係人唔多消費亦好平，係一個廣州市入面令我印象深刻又幾有感情嘅地方。

釋放負能量

呢排負能量好高，為咗健康我決定在此釋放一啲，不喜勿看。

．上一篇 post ，好驚會變 post of the year，在我的生活中勁 loop……（已有最少三個 target）
．又買 iPhone ，又係無乜開心嘅感覺，一來好貴，二來部機同上一代勁似，三來又係因為工業用因素而揀佢，充滿無奈感
．返咗新工三個月多少少，強烈感受到做 digital 工作機會多過做書好多，但係份工亦唔穩陣好多（雖然朋友曾經做紙媒都好唔穩陣）
．又係工作，做咗網站愈來愈少機會寫長稿，我懷疑我無長稿寫無訪問做會抑鬱
．雖然我識做好多嘢，但係更多嘢係唔識做。但係 most of all 最賴嘢係樣樣識少少，但係無話無咗我唔得
．老公養唔起我令我對生活非常擔憂
．我對錢嘅敏感度低令我理財能力好低，「跌」好多錢，但其實我好需要錢

眼前嘅嘢已經夠衰，未來嘅不可知已經唔到我擔心，不過我相信今年點都好過舊年，最緊要係平安同埋健康。

買你怕

通常我都好少仇口，好少同人交惡，自問底線好低。

如果我憎你，我直情會買你怕，驚咗你。如果有個人俾我呢種懼怕嘅感覺，經驗話俾我知係冇可能番轉頭。

唔好再走出嚟嚇我。

2014

2013 年終於都完了。我想很多最好和最壞的事情都在這年發生了。有些事是那麼垂手可得，但是令人感到無能為力的事情就更多。

其實我覺得盡力做一件事並不是我的風格。我覺得如果要出盡力才達到目的的話，那些事情或後果並不是自己應得的，或者這令到很多人認為我這種態度不夠進取，我想每天唯一可以做的事就是做好自己，那已經很足夠了。

還有一件事就是我經常都揀容易的事來做，不熟識的範疇的事很多時都被擱在一旁，這令我的生活形成很多缺憾。

2014 年除了懂得選擇之外，亦要坐言起行，希望那些不幸的事情會遠離我而去，今年過得比去年好。