Monday, December 21, 2015

#dailysnap

一幢大廈裡,中文由右向左變左向右,英文書院變成了護老院,仍住在社區裡的心情如何?

Tuesday, November 24, 2015

2015112X

我:公司D同事同你一樣,唔聽話
老公:咁你去跑步囉


理所當然,跑步減壓…

Monday, November 23, 2015

非常疲累,有冇原因

尋日瞓到中午,一家人去咗睇杯緣子展覽,今日又係瞓到中午,去咗區議會投票同埋剪頭髮,點知晚飯之後都好眼瞓,瞓到十點……

無論是否需要返工,個人都好疲累,唔知點解。其實湊仔同返工都係我唯一嘅「工作」,都唔算好忙,點解會咁?點解個人會咁頹?睇番一年半載嘅blog,真係頹到裂,如果俾朋友睇到可能會睇唔起我。

個人成日都好疲累,點解?我係咪太老要退休了?救命!

Thursday, November 19, 2015

筍工何處有

老公係自僱人士,見佢平時有一日無一日好似過山車,自己都有諗,其實自己搵啲嘢搞吓仲好。無奈係自己打咗工十幾年,如果我話自僱就自僱又成功的話,呢個世界應該冇乜人打工架喇。

近排市況淡靜,其實想搵份筍工唔容易。而近來又得知自己嘅工資同市價有好一段距離,其實據我所知,好多當年差不多時間出道嘅朋友都有呢個問題。不過只係一個諗法,要令自己增值,士途先有希望,依家但求唔好OT得太犀利,身體健康就得。

卑微的我。

Wednesday, November 18, 2015

Comfort Zone

呢個blog已經長期冇郁過。次次開番都見到最多人睇係「傳銷」單嘢,真係好冇癮,同埋有覺得個blog「爛咗」嘅感覺。呢兩三年實在發生好多事,引致到近來雖然生活常感到不如意,但都冇動力作出改變,ie. 好想繼續寄生喺呢個comfort zone入面。

不過前幾日行山,有朋友update咗佢公司嘅最新動向,夾埋近期發生嘅事,令我好感慨。其實打咗咁多年工,真係好難轉做自由工作,但係如果我想繼續有份自己鍾意嘅工,就要裝備吓自己。

寫出來都覺得老套到不得了,但都係一份感觸。至於點經營呢個blog,cover最pop個post,仲未諗到。可能依家都好少人睇blog啦,有冇必要呢?

Friday, September 11, 2015

牙已爛,造牙套(配色)

兩隻門牙爛晒要杜牙根,黐過補過都唔得,結果兩隻牙一齊造瓷套。

整牙丶挑牙根丶鑽牙丶上樁,當然痛苦,不過最痛應該係荷包,前後冇咗近3個月人工,同埋有D沒完沒了的感覺。

今日去咗荔枝角嘅center配番牙套嘅牙色,15分鐘完成,之後會再嚟一次幫隻牙着色。

Thursday, July 23, 2015

門牙要杜牙根(七八千蚊走唔甩)

睇番以前啲posts除咗美容院個post之外,最多人睇就係杜牙根個post。咁啱今年我又有兩隻牙要杜牙根兼做牙套,就分享吓啦。

今年初我左邊門牙超痛,於是想睇牙醫。由於我之前杜牙根經歷好痛苦,一隻牙整咗皮幾兩皮,仲要中間隻牙發炎痛咗好幾日個牙醫都唔開,於是唔再搵原本個牙醫。但係搵另一個牙醫俾多個機會自己,並冇因此有好結果。

呢次係搵一個舊同事介紹,佢介紹我一個西灣河搬咗去銅鑼灣嘅醫生,佢話個醫生係雜誌有介紹,幾好乜乜乜。咁我於是去卜,當日放工去睇。去到嗰個牙醫度,原來佢所謂雜誌介紹係我做緊嗰本雜誌(!)咁其實都ok,但最唔ok係佢一見到我就話,我整親隻門牙要杜牙根,但係佢專業唔係做杜牙根,係脫智慧齒。我少少想講粗口,因為我門牙真係堅痛,佢竟然要我照咗全副牙嘅X Ray,sell我脫智慧齒!

之後佢介紹我另一個專科牙醫,佢話個牙醫最出名係「放大鏡治療」,我都信佢去咗。但係我去到個牙醫度,真係由頭到尾都冇放大鏡,咪又係x ray,唔知放大啲乜。最後我都杜咗牙根,雖然杜嘅過程係ok唔辛苦,但係佢杜完牙根補完之後,唔夠一個月,我用牙咬包裝紙時隻牙就斷咗!一個月就斷都唔可怕,最慘係當時年初三,新年流流人在大陸,個樣衰住過年(唔記得帶con已經夠樣衰,真係衰到貼地),除咗sosad真係唔知講乜。

最後佢都幫我黐番隻牙,頭尾用咗差不多九千蚊,仲要未做牙套。(待續……)






Friday, April 24, 2015

札記 20150424

已經一排冇嚟,因為平時比較忙,有時間都係玩吓手提電話輕鬆吓。

寫咗咁多年blogs,都當日記咁寫,寫「流水帳」嘅純日記真係少人睇,只有得閒又想知我近況嘅人睇;反而一啲唔太貼身,有主題嘅post多啲陌生人路過留意。不過呢,總括來講,只係其中兩個post比較旺場(請參考popular posts嗰欄)。

好耐冇文,如果有時間,又有主題的話,都希望繼續寫,同網絡上過路人閒話家常,萍水相逢一下。如果想知我近況可以update我facebook。

祝大家身體健康,一切順心如意!

Monday, November 3, 2014

「港版奶粉」的價值

最容易接觸到奶粉廣告嘅地方,係地鐵同電視。呢排成日見到啲奶粉廣告有「配方專為香港BB而設」、「香港最受歡迎奶粉品牌」,我睇 / 聽後覺得極不順耳,原因係「你喺香港賣繁體字廣東話廣告,個廣告訊息明明不是俾香港人睇的,XXXX」

近排老公長居深圳,識咗好多當地生活的外省人。前幾日同佢個friend Z先生打邊爐,Z話帶一罐奶粉賺50蚊,我(心入面)當堂嘩一聲。記得買結婚戒指時(約一年半前)金至尊個sales話佢帶 0 號(孕婦奶粉)過羅湖,一罐賺 8 蚊。我當時覺得佢身為香港人出賣香港,為 8 蚊,將港版奶粉運出境,令到幾多香港人買唔到奶粉,實在太過份。但係另一邊箱,一年前聽到嘅 8 蚊,比起前日聽到嘅 50蚊,實在差得很遠。依家諗番轉頭,佢個價 8 蚊,可能因為 0 號奶粉其實可有可無,而可能當時未出限奶令,港版奶粉在內地供應充足,所以他只能賺到水腳錢 8 蚊咁大把。

我買一罐奶粉先 $293,帶一罐奶粉可以賺 $50,開頭聽落有啲不可思議,於是我襟計數機,一罐近三嚿水的奶粉,折合人民幣只係 $231(今日兌換價),如果罐奶粉以人仔 $293蚊出售,個差價已有 HK$79!也唔怪得上水火車站門口咁多人螞蟻搬家當返工了。

以我所知,內地最受歡迎的「港版奶粉」(如惠氏金裝),其實是有陸版的,之不過內地人覺得「港版有保障」,「在香港不會買到假貨」,所以才對港版奶粉趨之若鶩,這是誰造成己不用再多加說明了。既然港版與陸版是同一公司出品,來源、質量都相差不遠(理論上係),如果全世界仆去香港買港版的話,供應商只要 reallocate 啲貨量,放多啲奶粉在香港,咁就不會影響到香港阿媽買奶粉俾阿仔食了。之前咁多阿媽嘈買不到奶粉,只係因為供應商對於港版奶粉突然受歡迎來不及反應罷了。其實自從阿仔出世後,除了屋企附近間屈臣氏搬舖嗰幾日,我未試過遇到買奶粉的問題。

再望番啲廣告,其實生產商嘅語言暗示更見明顯,呢啲繁體字港鐵站廣告,其實是寫給來港旅行、入貨的內地人睇的。香港今日的田地,除了因為政府唔主動採取政策保障本地居民之外,亦因為外國人也爭相在香港這片土地上,向人民幣跪低。無論任何國籍,人生在世其實很少會同錢作對的,就係咁簡單。








Monday, October 6, 2014

「自製」detox water

前排好興detox water,好多人整嚟飲放上網,呢排已冇人咁做。前幾日阿媽買了個雜果涼粉,因為太飽冇即日食,第二日食了,但發現西瓜索了涼粉水味道少少怪,但已吃了三分二…

食完怪味涼粉翌日去廁所非常暢順,沒有肚瀉,可能detox water都係呢個原理。平時我哋咁驚食過期嘢,咁驚食壞人,其實可能不必。(網上圖片)

Thursday, October 2, 2014

【發窮惡】窮也樂呵呵 森川弘子

有一排真係覺得自己好窮。人工就唔好提,以我同屋企人嘅收入根本係無可能喺香港買樓自住,一諗起呢種貧窮生活自己都覺得好灰。但係喺啲social media度又好難咁講,因為「表面風光」先係social 之道。事實上我真係覺得自己真係非一般的窮人。

呢本書係書展期間喺大陸出版社booth度買,老老實實我呢兩、三年真係幾乎完全無睇字書,睇嘅都係圖文書,而且好多都係大陸版,因為平啲。不過我都有買港版,不過都係因為大陸未出或者無那本書。其實依家我買嘅多數都係大陸嘅日文譯本圖文書,另外就有買香港本地圖文書與本地流行作家嘅散文集。

講番本書,買咗真係無時間睇。咁啱今日放假就一氣呵成睇晒。本書講個作者為頭家點慳家,睇完真係覺得自己雖然有時都幾慳但真係唔夠佢慳,本書原名係叫《150萬年收入家庭的生活》150萬yen嘅年薪即係港紙 10萬,喺日本紙水咁高,一家三口年食 10 萬真係好得人驚,而且日本人咁要面,你一家人年薪十萬仲要話俾人知,又會唔怕無面,都幾「另類」……亦可想而知日本依家幾經濟不景。

睇完本書我覺得自己都唔算好慳,唔算好窮,除此以外,作者從「慳得一蚊得一蚊」中得到嘅快樂又真係好有感染力,令到人睇到本書之後會覺得,其實窮都可以自找樂子,非常正能量!書入面最感動就係佢講自己成日參加抽獎,有一次抽到隻長腳蟹,咁佢同老公好開心咁分兩餐食咗,食完啲殼仲留番來加蟹柳煲粥俾阿囡食(佢話阿囡太細(應該未夠一歲)唔食得蟹,所以唔俾佢食蟹肉……),最後佢補多一句話「希望阿囡大個之後,有能力自己買蟹食。」真係睇到眼濕濕。

另外書嘅其中一個單元係講作者好鍾意去旅行,去過歐洲亞洲好多地方,阿囡出世之後仲一家三口去 Paris,洗咗 40 萬yen,即係全年家庭收入嘅三分一!真係好捨得!仲話要趁阿囡兩歲要俾機票錢之前去多啲旅行,雖然窮都咁有 passion 放眼世界,我真係要俾個服字!

作為一本正能量嘅消閒書,呢本書真係幾好睇。不過書入面有啲位我有懷疑佢譯得唔係幾好,例如作者買二手衫,一件「十蚊日幣」、一對BB鞋仔「五十蚊日幣」,我懷疑其實係佢本書翻譯時搵咗一堆人一齊譯,銀碼上有些譯者係跟番日幣有些係人民幣,形成一片混亂,校對的編輯未盡其責將之修改。我相信如果佢買件衫真係10蚊日幣(約人民幣五毛)咁不如唔好收攞。




窮也樂呵呵   森川弘子 RMB 28

Wednesday, September 10, 2014

目光放遠

中秋假之前我日日告訴自己要換床單,結果假期裡我什麼都沒做,床單在我睡前15分鐘換了。

目標放遠點就是這原因。

Sunday, April 20, 2014

聖羅蘭 Yves Saint Laurent

PR送飛,一個人去咗睇聖羅蘭。其實我好少一個人去睇戲,對上一次已經係《失憶界刂女王》,喺太古城UA(11年前!!!)。今次睇戲其實都係當課外閱讀,溫故知新。

入院前預咗會悶悶地,的而且確,成套戲就係由羅蘭先生入行,講到佢死順序進行,不過對於羅蘭幾乎一無所知(剩係知佢係法蘭西人同死咗)的我來說,此片都算極有參考價值。由於要respect番片中兩位男主人公,我相信呢套戲好大程度上對佢哋美化咗、修飾咗,但亦都無損佢呈現史實。

睇完戲撞到 ex 公司營業部同事,佢同老婆一齊睇,之後隨口問我去咗邊度做。佢走咗之後我醒起佢都好似轉咗工(?又好似唔係)anyway,我都係打工嘅材料,事實證明,我好難做自由人(雖然未做過,但事實),所以還是俾心機繼續打工吧。

推介俾:鍾意時裝但唔係好熟聖羅蘭的人
唔啱睇:想睇靚仔、靚衫、所有搭錯線的人


Saturday, April 5, 2014

祝願棉花身體健康

老公在清明節回家掃墓,順道去探棉花,他說棉花有小寶寶了,可是一天到晚在軟墊上睡覺,叔叔說牠很懶。其實棉花一向身體也不大好,生寶寶未必應付得來,祝願棉花身體健康,生出可愛活潑的小寶寶。

希望有一天我也可以回家看看棉花。

Tuesday, March 11, 2014

【fb文】可怕的西藥

食西藥好多時令人昏昏欲睡,但有時會有反效果,我阿婆90+++歲,身體退化加上呢幾日天氣潮濕,成日嗌頸痛。輪了街症都唔好於是用醫療券睇醫生,個醫生扣了四百幾蚊(一年好似千零蚊),可能因為收了咁多錢就做啲嘢,俾了3款藥,食了就話唔痛,但係同時變得非常亢奮,平時六點瞓到六點,呢2日見佢冇乜瞓,一日到黑周圍行不停講嘢,仆親撞到頭,將個披袋拆開話要造衫,嫌隻貓嘈將佢困入我房(平時撞聾)。。。。

被嘈醒之後摷佢啲藥出來睇,其中一隻消炎藥decflonac食咗可能會焦慮丶失眠、精神錯亂。。。!!
因為瞓得少平時揀飮擇食嘅阿婆將成個麵食晒,我希望佢食多啲將啲藥排出體外。。。不過到時又嗌痛的了。
西藥真係好可怕冇乜嘢都盡量少食。