Sunday, August 31, 2008

午餐就係公仔麵

悶到爆,o係屋企自己一個人整o左個麵吃。自從中學畢業之後,就好少自己整公仔麵食,一年都唔知食唔食到2、3次,近排反而食多o左。公仔麵睇起o黎普通,但係平時同d friend講開,發現個個人整公仔麵o既方法都有少少唔同,今日我就用o左新o既方法整公仔麵食。

1. 將個麵放落d滾水度,d麵勁起泡,d煙又升晒上o黎,乜都睇唔到


2. 睇真d,就係咁樣樣


3. 另一邊廂我就鋪左3塊火腿o係個碗入面,d火腿預先畀人一開2 o左,另外將d味粉倒o係上面


4. 個麵煮完就係咁o既樣。聽人講話d水好冇益,於是我有生以來第一次倒開d水再滾過另一鍋水


5. 因為掛住影過程d麵好似整得過稔;另外多加o左半塊火腿,total 2 塊


6. 將d重新滾起o既水倒落個麵度,d水果然清好多


7. 將所有材料撈埋一齊,d細細粒油花o係個麵上飄浮,真係好靚啊!


8. 因為落多o左水,所以個麵稍嫌太清,好在有幾塊鹹鹹地o既火腿送住o黎食,食完個湯仲係咁清!!!

好掛住twins...

我成日都話鍾意stephy,其實最鍾意同我同期出道o既twins。今日睇電視見到sa同金牌運動員合唱,好掛住twins兩個一齊o既日子……不過有d野過左唔可以返轉頭……「相愛6年」,就係咁一語成讖……-_-

入世 / 出世

今日下午約o左jacky吃飯,去o左金百利7/Fo既「翹」度食定食,o個度係食日本野,有少少港式feel,但係兩個人吃只係一百蚊有找,非常抵食又好味。

以我記得起碼半年冇見過jacky,佢o既近況幾好,轉左新工,係做call center,我自己覺得做call center係好辛苦o既工作,雖然可以不停咁講野,但係d人一打去call center通常都係想x人,我對佢o既新工都幾有興趣,問左好多野,佢亦不厭其煩咁答我呢:)

屈指一算識左jacky已經好耐好耐,當年佢係S7我係year 2,e家佢竟然係話自己已經同d fresh grad係溝通唔到……真係好多年好多年架喇,係呢度講出黎都無謂了,哈!

jacky話佢好多同學都係做社工啊或者學術研究工作,諗野比較理想化,相反自己就比較入世。我也是一個努力入世的人啊……雖然未必做得盡善盡美,都希望自己在商業社會中能夠打滾得游刃有餘,哈哈。

有時看書、看電影,都會想起讀書的時候,有時也會用理論去解釋番自己睇左既野,回味番讀書時既日子。但係在現實生活中,做野既手法就比理論更加更加更加重要了。

今日同jacky聚舊真係好開心,之後又同苗去左行一陣街,但係因為太累,又返左屋企瞓晏覺,過了非常悠閒的一天 :D

Saturday, August 30, 2008

兒時飾物

尋日去分唇遇到杰,佢話好想去《兒童樂園》o既展覽,跟住失驚無神講起小學時非常流行o既飾物──o係金屬框上面用o的粗o既彩色繩織d花紋出黎,掛o係書包上面。

呢樣o野真係唔知叫乜名,於是o係度畫出o黎,都幾得意,哈!


disastrously燥

今日同慧蘭食飯,佢覺得自從我轉左工之後就明顯地非常燥底,她叫我好好想想工作上的事情。食完飯又走o左出去飲o野,我問yokki我係咪燥o左,佢話我後amy時代已開始出現燥底現象,問發強佢話唔覺(!)……諗番起前幾日鏡淘都話我好似唔係好開心,general o黎講我覺得都係有問題出現o左。

之前我只係想做左咁多年出版,出版應該係屬木(五行),做web應該係金or火,所以突轉,搞到連隻眼都壞埋。這種想法極不科學化,但我覺得有道理。不過這種想法有不認真之嫌,正如近排無論1234定5點瞓覺,都一定會7、8點無啦啦醒o左,之前美其名係話自己過番有規律o既生活,但係實際上我今日諗番我只係default番讀書時7點幾起身返學o個樣o野出o黎,連潛意識都冇好用心咁去適應新生活。

只懂得埋首做眼前的事情真係唔work,這樣下去只會吃力不討好。星期一就係九月一,份工做左整整兩個月,係時候好好認真地思考自己工作的取態與路向,不然對自己對公司都極之不利。當然,也不要乜都賴晒做o野,除o左工作尚要好好想想其他事情。

***

講番尋日,放工本來累爆,連出街食飯都想慳番,點知食完飯仲要過海飲o野,飲到成將近5點先返倒屋企……食飯連飲o野溝o左勁多款酒,sake、pina colada、champange同埋red wine,又話唔溝得酒飲,真係無可能唔出事,所以先咁夜先番倒屋企-_-

***
我飲大o左個人比較隨和d,但係(無力反抗之下)隔離檯就有人撩事鬥非「乜你近排好得閒咩?」、「乜你食煙架咩?」哈哈哈哈,有興趣可以估下係邊個,估中獎你一個叻字。

***


前晚想起讀書時好鍾意的歌,那時極度沉迷一個人去旅行。人大了就不會如是想,不要說不會當人生是走馬看花,就算是趣趣地去幾日旅行,遇上不合的夥伴都會嬲爆!:p

Friday, August 29, 2008

同學聚舊

今天與預科同學一起食飯聚舊,大家一年見幾次,但感覺沒有生疏,也有很多說不完的事情,吹水當然少不免,也有談論一下貼身的事情、大家的近況。

平時我在朋友堆中總有說不完的話,都是瞎聊一通。今日vincent說我的生活好像很多姿多彩,其實如果日子過得不沉悶的話,也是因為工作不穩定之故,情況就是我近來常說的「有辣有唔辣」了。星期二食飯,文興說我好像有點不開心的樣子。返新工,當然有些壓力,加上由以前不規則的生活到近期想把生活整頓規律化,也是很花氣力的事……單是眼睛的事就夠我煩了整整一個月了。

說到最尾,開心不開心,某程度上,自己是有選擇權的,希望我的生活也會越來越好。


純貼,請勿留意歌詞

Thursday, August 28, 2008

「欖」出沒注意……

港鐵車廂「不准飲食」的文化深入民心,但是車廂之內還有很多「污點」需要隨時提高警覺,例如出口附近的透明玻璃經常黏滿頭油,又例如……


昨日乘搭港鐵回家途中,嚇然發現其中一座位正中央有一督欖形血跡!!!!當時正值「站頭站尾」,車上幾乎無人,所以輕易察覺,但如果是平時繁忙時間,真係坐o左落去都唔知咩事啊?!


那督o野實在太可怕,也覺得把這件事寫出來有點突兀,但也很想提醒大家,平時我們搭港鐡,都會不為意車廂內發生甚麼事情,自顧自拿著手上的NDS、PSP、I-Phone、東地、PCM或者metropop瘋狂地陶醉在自己的世界之中,其實忽略了很多身邊的事情。


沒有警覺性,其實是很危險的……-_-



給大家看看另一樣「紅物」──我這幾天的甲色,遠看非常漂亮!但要塗得仔細就好不容易喇!

Wednesday, August 27, 2008

草菇頭變栗子

前日開會咪嘈話我的頭髮變了啡色,我說可能是燈光折射效果,又可能是風筒吹乾頭髮時令頭髮受傷了。昨晚夜闌人靜無所事事時想起自己用了這個:



引用:
Aveda限量復刻版丁香洗髮水

1978年是Aveda創立之年,屹今已踏入第30個年頭。為慶祝Aveda創立30週年,特別再度推出Aveda第一支面世的產品──丁香洗髮水。

功效
溫和潔淨,適合啡色或蜜糖色的頭髮使用。

星級成份
• 經驗證有機丁香──增強暖色調
• 經驗證有機咖啡──增強啡色調

香薰
蘊含經驗證有機檸檬、依蘭依蘭、黑胡椒、多種純花及植物香薰精華,令人精神煥發。

$120 / 237ml(9月開始,購買任何產品,均可以紀念價$78換購)


哈哈!這並不是染髮劑,用後當然不會令頭髮變成非常明顯的啡色,只是平時看上去頭髮有少少啡,特別在燈光照射之下,頭髮看上去有栗子色的感覺。另外要一提的是,這雖然是30年前推出的洋人之物,聞下去的感覺及質感有點似京都念慈菴枇杷膏!:p是否好味則見仁見智了。

Tuesday, August 26, 2008

飯局隨拍

好久沒拿起相機拍照。之前的工作要每天寫blog,而工作的blog又以有相片的較有可觀性,於是拍照片就成了工作的一部份,漸漸對拍照失卻興致。近來工作放下了攝影的包袱,反而重拾背後的意趣。這些照片別人眼中可能不甚了了,我自己卻是很喜歡。


隨手按快門拍了這一張,我覺得拍得很自然,捨不得後期加工。但相中人不大喜歡,她說不大看到自己的樣子。我想女孩子多是喜歡清楚看到自己樣子+穩藏了瑕疵的照片,這張照片對於被拍者來說是不合格。


我很喜歡這張相的cropping,椅子部份可以用來做wallpaper,哈哈,也很鍾意這張相的mood。由於燈光不足,拍起來有些手震,雜訊也很重,對於攝影發燒友來說也是不合格。


這張我自己覺得很酷,也很喜歡,但相中人覺得樣子很兇,不像真實的她。總的來說,這算是一張講大話的照片。


我和winnie大笑的樣子。


winnie的酒量比我好,我喝了兩三杯就進入微醺狀態。


我們在自己的星座前合照,我們是同年生的啊,哈哈。

用DSLR影snap是不是有點奇怪呢?

攝影可說是我自預科畢業以後,由旅行留念照開始慢慢培養出來的興趣。我自己比較鍾意用DSLR Manual模式拍照,變數較多,這方面dc一定遙不可及。雖然拍出來的照片不及專業水準,但當中的趣味卻不能言喻。

我自己認為,「美與醜」某程度上存在著客觀標準,不過到了最後,拍照片也是為了自己喜歡而拍,也不用太在意其他人品評的眼光吧。

Sunday, August 24, 2008

甜辣城o既公主

消失左廿年o既《甜甜小公主》竟然畀人撈番出黎,仲變左真人版!


主角井上真央,乜個樣咁似陳自瑤……

原裝o既主題曲(1986)


港版主題曲(1988)當年d卡通片竟然可以播晒成隻歌先做!

肥婆的威力

尋日在mk食糖水,發生超離奇事件。間糖水舖都幾旺場,六、七張檯,幾乎坐無虛設,仲要擺到出街。入到糖水舖都係得一檯係吉o既。忽然之間走左個肥婆入o黎,人地做講,佢做笑,笑到鬼咁大聲,10分鐘之後成間舖頭o既客已經畀佢笑走晒!!!!!但佢個friend e然懶理繼續講,佢就繼續笑(佢個friend係有公德心,講野聲音係normal)!

開頭諗肥婆真失禮(睇個樣似同我差不多年紀),但係想深一層作為肥婆受盡社會漠視同歧視,笑走你班傻仔,可能對佢黎講係一種存在感o既表現,明知故犯o既病態行為。

我當然唔係可憐佢啦,其實好多肥o既人都好cute同好可愛,係佢自己揀呢條路咋!


呢個就係被迫快食o既「金玉滿堂」(粟米、海底椰、西米)

Saturday, August 23, 2008

簡單快樂

今天難得因為颱風而留在家中,可是卻因為風太大,天氣惡劣,被迫足不出戶,極具量只是多了一天的睡眠時間罷了。不過做人不要貪心,這樣已很好了,不是嗎?

又因為休養關係,外出較少。一想到外出=花錢,也有點令人頭痛,因為眼鏡、電話、轉季……都是必要支出,現在工作還在試用中,實在無謂花太多錢呢!不過假日出外走走,留在家中就看書、上網、看電影,也很容易感到納悶的。希望快點到秋季,可以去郊遊就好了!

今日我想,做人簡單快樂就最好不過了。不過話說從頭,無論是工作也好,日常生活也好,也很容易遇上一些不順心的事情,有時硬把事情想得簡單化,也未必是最好的……只是simply wanna be happy也不是容易的事。

很晚了腦袋不能想複雜的事情了,晚安。

Thursday, August 21, 2008

生活速記

因眼睛疲倦,近來少了在家上網,要想些別的事情來做。這是邊看電視邊講電話邊塗指甲油的製成品,是近來我心儀的「漸變色」。


頭髮太長了,沒有了髮型,於是去了剪髮。


這是第二次光顧的髮型師,他很有心機為我剪。近日的經歷令我更treasure優良的顧客服務。


這是今日收到令同事們驚嘆的東東:鹽晶燈,是flare公關公司送來的心思。它其實是一塊鹽,開著它可以釋放負離子,提升身體機能、鬆弛神經。它令我想起「喜瑪拉亞山粉紅岩鹽」 :p

Tuesday, August 19, 2008

爸爸的眼睛

雖然我的眼鏡的事情還未解決,但視力的問題總算解決了,也是一件令人感到安慰的事情。

昨天在家裡吃飯,吃到兒時最喜歡吃的炸雞脾:),媽媽跟我說花了的錢就讓它花掉好了,最重要是把眼睛的情況弄好,說得很有道理。之後她又告訴我爸爸之前也配了兩副眼鏡,可還是驗配不到合適的度數(我老豆深近視,但無我咁深,老左可能有老花啦,我估),現在混沌的世界過日子。

晚飯後我給爸爸看一隻蔡琴dvd,他把輕輕把眼鏡脫下來,用心地看封套上的字……我才又想起媽媽之前說的話,有點感慨。如果不是媽跟我說的話,我也不知道有這樣的事情。回頭心想,自己這次眼睛受傷也用了差不多一萬元,大概爸爸也捨不得花這樣的錢吧……我每個月給他的錢,本來是用來交管理費的,他都存到我的儲蓄保險去了-_-

其實昨天是妹妹生日,我有吃她的生日蛋糕,但我跟她沒兩句,一個月不跟她說一句話那種。就算跟弟妹感情淡泊,也要提醒自己關心父母。

這幾天睡不穩,醒來就想到這樣的事情。

準備上班了。



爸爸與我 :P幾年前拍的了~

10磅消失

星期日同苗一齊去佐敦谷泳池曬太陽,o係泳池門口個磅度磅重,發現自己唔知點解唔見o左10磅,令人難以置信!於是游完水再磅,竟然又輕兩磅。之後唔信,再去ikea度搵d磅o黎磅吓,發現讀數一樣;今日再囉屋企個磅出o黎再磅一次,先確定呢個係事實。

07年至08年6月做o左成年gym,幾乎一磅都冇輕過,只係隨住生理周期體重有升有跌。呢一年流過幾多汗,捱過幾多餓,自己心裡有數,但竟然係冇做gym 3個月反而冇o左10磅,實在費解。

如果一定要為減磅下註腳,都唔一定冇原因,疑似原因如下:

.冇做o野一排o係屋企食o野都懶,食少o左好多o野
.返新工之後心理壓力大
.上個月整親隻眼之後唔開心
.冇做gym,冇晒d肌肉,得番脂肪
.食o野之前成日特登飲水,食少o左o野
.公司比起上一份工距離地鐵站遠,行多o左路
.成日去events都鐘意特登行多o的,久而久之做多o左運動
.以前一日到黑坐o係公司,一日三四餐o係公司食,又一星期飲三次茶,依家冇咁做
.起身瞓覺定時定候係會瘦o既
.食多o左糖

最尾o個幾個原因太勉強,應該除o左上述原因之外都冇乜特別原因。前晚我又特登囉番以前d相s出o黎睇,發現自己一拍拖就脹爆,都幾明顯……可能我個人思想簡單,開心就肥d,但又唔覺得自己呢排特別唔開心。

諗到尾,好可能純粹係因為太熱流太多汗所以瘦o左都唔定。其實瘦d雖然近睇可能乾d,面色冇咁好睇,但係化妝都可以補救到,最重要係著衫好睇d,人都開心d!~

以下係比照e家同一年前o既我,睇個形狀真係唔覺冇左10磅呢!

08年8月↓


07年6月↓

Monday, August 18, 2008

眼仔的下場

勁無奈!

今日去左polyvision recheck對眼,視光師幫我配副眼鏡睇遠野好清,深到睇唔到個mon(遠清近朦)……咁我諗住換番淺d……其實我應該一早預左換野係好麻煩,果然佢都唔想幫我換,仲suggest我睇遠野先用新眼鏡,近野用番舊眼鏡,我又唔係老花做乜要帶兩副眼鏡出街:(!!!!戴深眼鏡根本就連行街買件衫個價錢牌都睇唔清啦-_-。最後佢只係願意幫我換左邊眼仔,右邊就唔換。

其實右邊眼仔係lazy eye,睇野唔係好清楚,照計佢咁lazy度數應該仲淺……但佢都唔想幫我換,而我又覺得自己唔應該太critize佢專業,所以結果接受左佢換左邊鏡片畀我。當然右邊眼仔度數係咁深左,呢一個謎我係唔知道。唯有同自己講換到一隻都好過兩隻都換不到。

我懷疑我激瘦十磅就係因為眼仔呢件事太激心……睇番blog原來7月15日約左yokki同henri食恆河o個日已經發現眼仔勁乾,乾到睜不開眼,到今日已經一個月有多。眼仔真係好重要!唔知5定6歲我讀幼稚園時阿媽見我見到鍾意o既玩具唔知點解哄到好埋去睇,足左我去驗眼,開始左我戴眼鏡o既生涯……如果我係古代人或者鄉下人,可能唔會有近視,但如果我o係無眼鏡o既地方大近視真係唔知點生存落去。

激死o左……

Friday, August 15, 2008

悄然離開

前晚在客廳呆坐也沒有發現,原來龍貓仔pat pat (6)已在昨天晚上離開了我們。

(以下綜合了父親和母親的轉述):

「昨午有陌生人到訪,龍貓仔大驚,懷疑受驚過度亂跳,及後全身抽搐,出現呼吸困難現象,於是妹妹乘的士帶他到東區動物醫院搶救,醫生證實他心臟衰弱及嚴重缺水,須留院觀察及接受醫治,最終延至昨晚不治。」

龍貓仔就這樣無聲無息地離開我們。其實近日天氣炎熱,根本不適合龍貓仔居住,早於上星期妹妹已發現他甩毛,著母親每天為他洗澡(本來是一星期一次),而且在他離開前一、兩晚我還給他吃牛奶糖,他還會開開心心跳出來津津有味把糖吃掉,想不到現在已經不在。

我沒有照顧他的pratice,但是他會認得我,和兔仔聽到我的聲音都會以為是「零食時間」。有時我覺得他們也有點可憐,每天呆呆地在籠裡跳跳坐坐,最開心就是食粒糖,想到這裡就有點心酸的感覺。有時也想抱他逗他玩,可是每抱他他都從打從心裡震出來,我想這是因為chinnchila世世代代畀人拿來做皮草,基因裡對人類產生抗拒感之故。

無論如何龍貓仔(我叫佢老鼠仔)已經走了,在此祝他一路平安,永遠記得你愛吃糖時跳來跳去的可愛樣子。:'(

Thursday, August 14, 2008

-_- super depress -_-

尋日下晝本來好開心,約左wanchai lunch leg陪我囉眼鏡,同埋去左8番食拉麵,d拉麵好好食但係副眼鏡唔係好岩度數,我覺得唔對路但係視光師叫我戴下先。

番到公司就忽然之間爆多野做,副眼鏡真係非常之朦,睇遠野好清楚但係睇近野就連我前幾日受傷o既視力都不如……灰爆之下唯有戴反副舊眼鏡做野……

放工約左O強打邊爐戴番新眼鏡,望住d肥牛、蝦同菜係個爐上面飄飄下,都覺得好sharp好靚,睇近野睇近野都唔錯……但係第朝一對住個芒就灰爆,睇唔到d字,要帶番舊眼鏡……

今日去覆診我估對眼都可以好番,但係對眼真係令我好煩惱……最慘係未過試用期請假去睇醫生同埋驗眼都極煩!無得去玩已經算喇,番工仲要咁辛苦。我好懷疑自己係咪應該做d咁side眼神既工作……鍾意睇書睇戲影相畫畫全部都係錯,-_-可能係屋企休息下再諗諗會更好。

灰 x 7,000 再講眼仔已經無人理我了 -_-

Wednesday, August 13, 2008

母校金禧慶典(轉貼)

wa,不經不覺畢o左業成10年!哈哈哈!出年係學校50週年,年尾將會大搞,請大家多多支持!

以下轉貼由張sir發出o既文集徵名徵稿呼籲:

佛教黃鳳翎中學五十週年紀念文集

1. 籌辦文集目的:2009年,是母校五十週年紀念之時,歷屆同學倡議印刷一本紀念文集,以此慶祝,以留紀念。

2. 徵求文集名稱:
例如:春風化雨金禧情 情繫母校五十年
截止日期﹕2008年9月

3. 徵求稿件詳情:
稿例如下﹕
a. 稿件以懷念母校的校園生活和人與事為主
b. 文字中英不拘
c. 每篇篇幅不超過一萬字
d. 稿件以Microsoft word format
〈電郵地址:bwc_alumni@mail.bwflc.edu.hk〉
e. 若附照片,照片說明文字以簡明扼要為主,並附拍攝年份
f. 截止收稿日期﹕2008年9月
g. 作者簡歷:在母校畢業年份,學歷
h. 編輯委員會有選稿權利,落選稿件恕不奉還。

Tuesday, August 12, 2008

奧運《聖火令》

對眼仲養緊傷,好一段時間冇update個blog。今日收到阿三send畀我o既呢條片,勁惡搞,一定要share畀大家:



阿三話佢會o係片尾度出現,睇o左一次唔係好覺,再睇,發現原來佢係飾演吉祥物貝貝(藍色),哈哈哈,笑死我!好笑到值得一睇再睇!

期待下集 :p

Sunday, August 10, 2008

激死我喇!

好對唔住,自從離開o左amy之後,可能係因為食少o左o野o既關係,個人脾氣暴燥o左,成日「描」聲4起!真係好對唔住大家!

但係尋日o既事真係不吐不快。

尋日去左中環威靈頓街上樓o既日食放題店「大吉居酒屋」度大食一餐,但係食o既過程令我一肚子氣:

1. 一坐埋位就畀五六款汽水人地揀,試圖用汽水填飽我地個肚
2. 食物都幾好食o黎得幾快,但係就死都唔o黎刺身,仲要老屈話「冇收到我o地張單」
3. 服務員勁串,如講o野冇尾音,又例如收碟的時候,用命令式指住隻碟叫人囉畀佢:「你隻碟xxxxxx」,沒有pls、唔該等等,極無禮貌
4. 汽水係任飲,但order汽水時佢叫我地keep番支飲管!感覺好小器!
5. 第二碟刺身等o左over十分鐘都未黎(十個人食,第一碟只每樣叫了五件!),當我表現鼓譟時,竟然大聲放音樂來掩蓋我的聲音!!!!

令人最嬲當然係point5啦!激死我!最後我要補充番,由於呢個活動係為o左慶祝irene生日而舉辦,而且係bon畀心機策劃o既,我o既所作所為實在唔係幾好,但呢間野真係令我太嬲喇!

我的工作有時都要serve人,我覺得千錯萬錯,都唔會係個客錯,有氣都要吞進肚子裡,背後不停同同事訴苦或在客背後暗罵又係另一回事啦……如果係客面前謙卑d都做唔到我覺得唔係好professional囉!

最後補充,呢餐食o左唔使$200。以中環區食o野o黎講係好平添,但係食buffet / 放題o既精髓係唔使顧慮,隨心隨意點選自己鍾意o既食物,雖然$200唔係大數,但我相信我畀得呢個價錢,唔食放題,唔使就住就住都有好多選擇。食得唔,做乜要幫襯你喎!!!

Saturday, August 9, 2008

報告近況

近日好少上網同寫blog,讓眼睛好好休息。前日去左做facial,美容師話我隻眼生左粒瘡,令我好驚,於是走左去睇眼科醫生,醫生話我隻眼太乾,乾到損左,畀左d消炎藥同潤眼液我滴,仲要覆診。

雖然睇專科醫生係好貴,但係睇一睇自己安心d都算係值的。睇完醫生即刻好開心去左h&m買左d accessories,跟住返工。希望快d好番,番工快d順暢番就好lu。

除左眼睛,近排成日疑神疑鬼驚自己有病。例如好多人話我瘦左,開心之餘又會驚會唔會有暗病啦。近排可能天氣太熱,室內冷氣太凍,空氣太差,個人冇乜胃口食野,有少少作悶又無病出黎咁。咁o既情況,真係要小心d身體先得。

大家都要好好保重,保持開心,人都病少d。

Tuesday, August 5, 2008

眼睛情況日記

●=朦 ○=清

星期一●:眼朦朦唔開心,夜晚去左眼鏡舖度想驗眼,但佢唔理我
星期二●:無戴con,一早去左驗眼,對眼朦極,驗眼成績好差
星期三○:繼續冇戴con,開始清番,但眼鏡度數淺,在press con和wincy同場都看不見
星期四○:冇戴con去驗眼,對眼變番正常,驗眼成績理想
星期五○:由於早上book左試化妝品,所以戴番con,戴到凌晨都咁清晰
星期六●:之前一日戴得太耐,對眼朦番,去街見到認識的人,但人地見到我我見唔到佢,要人地主動叫我,非常唔好意思
星期日●:繼續朦朧一片,在家休息
星期一○:早上戴住con去做視野檢查,做得唔係幾好,配左眼鏡,下午如常工作;放工後驚對眼太累所以戴番眼鏡先去玩,番黎眼睛狀況都okay

由於戴眼鏡工作真係好唔方便,出分唇又唔係太presentable,所以我都傾向戴con番工。聽日晚飯約左朋友,都會好似今日咁,先con後鏡,希望對眼一樣好似今日咁好!

今日多謝bengy陪我睇眼鏡同請食粉!~我揀左紅色眼鏡!~

Monday, August 4, 2008

又眼朦朦

星期五因為約左試化妝品諗住戴con(睇番星期五個post),跟住又無啦啦興起想睇戲,就戴con戴到一點幾,第二日對眼又朦番,e家尚未恢復……以前番工寫稿寫到5am,第二日晏晝都可以照番工……都有少少後悔,唯有安慰自己一次經驗測試到自己戴con的底線(就係冇得戴……)

最令我擔心係e家份工都好需要對住mon工作,如果情況無改善可能連工作都不能勝任……

呢件事除左自己鍾意打機之外,都係積勞成疾之故。明明是工作盡心盡力,差d囉埋條命出黎,一轉左工就無晒工傷保障,這就是頻頻轉工的壞處了。偏偏這些事情,又是非常身不由己的。

Saturday, August 2, 2008

my little cupcakes

today i attended a cupcake workshop, these are my cakes:



top view:


cakes in the box:



these are juju's cupcakes. although my cakes are not as pretty as juju's, i still love my cakes so much, becos they're my sons! hahahaha!

化妝前 / 化妝後公開!

化妝前:11am


化妝後1230noon



化妝後 + photography_anson


makeup_kinder@becca

Friday, August 1, 2008

重獲新生

這個星期初我經歷了非常唔開心的幾天,由於睡眠不足加上對mon太多的關係,我的眼睛視野一片模糊,前幾日的情況就如一部忽然function唔到auto focus的相機一樣絕望!!!!對於多年來深近視但眼睛沒甚麼大問題的我來說,實在很大打擊,經過一段時間的休息之後,眼睛情況已大大改善。

為了自己的眼睛健康著想,要去配一副新眼鏡,及接受視光師的建議多戴眼鏡。對於這點我當然是極不願意啦,我的打算是工作、室內活動戴眼鏡,然後慢慢習慣戴眼鏡的自己。

今天我們嘗試戴番con,希望一切安好。

昨天接過7月份的糧,才驚覺自己番新工已經一個月了。這個月的生活有了很大的轉變,工作模式跟以前有很多不同,另外就是日常生活上。上個月我沒有特別找些世藝甚麼的但就是經常出去玩玩,缺點是花錢很多,不過也識了很多新朋友。

另外為了配合保護眼睛的想法,之後也會少一點上網。如此一來我的「小遊戲分享」會擱置,但我仍然會在這裡不定期分享小遊戲的。前幾天因為不能上網又沒有去街,在家裡找些事情來做,其實感覺很不錯,上網的生活只是因為認識朋友太多但家裡空間太少而衍生出來的生活模式吧。以後要少d msn,多d打電話,哈哈。希望大家唔介意成日接到我的電話~

對於以上種種,還有別的事情,其實也令我有些壓力。前一晚本來夜睡,但昨天早上竟在7點突然之間醒了,心裡空空的有些茫然……那一刻的感覺很震撼,但想深一層其實並沒有甚麼不好的事情真的發生了。我相信快樂會隨著真心地好好生活的心而來,但願如此。

* google d ad真係入晒位,吹脹↑