新髮型

今日好忙，去了 3 個 events，之後去了剪頭髮，個頭好耐無剪，已經超樣衰，剪完勁靚，加上 event 時 某時尚品牌 make up director 幫我補色，個眼妝好靚，所以一定要貼這長照片。



和朋友s飲野，好開心的，我也很想擁有，愛情的無悔決心和勇敢！~

duck is love

太太太甜膩，我受不了！

前幾天盛讚 b 「好長情」，他十年還是那麼喜歡卓韻芝，年年去書展都捧她場。之前我在上一份工要負責寫新書介紹，所謂的新書介紹其實部分是我想看的書，部分是我認為覺得值得介紹的書，都是沒看 / 未看的。差不多離職之前介紹了這本，節錄了書背頁的介紹：

「內容簡介：

什麼是放手呢？你不愛一個人了，這不叫放手，這叫做放棄；
你移情別戀了，這也不叫放手，這叫做淘汰；
你覺得很悶所以分手，這也不叫放手，最多只叫轉身走。

相反，愛一個人，但發現（無論如何還是）相處不來，唯有分開，這才叫做放手。
又或，愛一個人，但明白對方已經不愛自己了，唯有忍痛退出，也叫做放手。

「放手」一詞，往往包含覑戚然與無奈。
我見過有人不停哀求對方回來，無所不用其極，
電話日打夜打、電郵日傳夜傳、巴結朋友、喊生喊死，
我知道，她一定很愛他，只是她還是未明白，有時，

愛就是要學會放手。」

可能是這幾句說話太能觸動人心，我也不知道「我寫」（嚴格來說不是「我」、「寫」的）的稿同事也會看，但是那本書有兩個同事問我是不是真的有，說到我也很想看看。

前排在mama的書架看到這書，今天借回家看，看了幾頁真的看不下去，都是作者和男朋友打情罵俏私生活分享，以及她的拍拖心得感想……

超級頂唔順 -.- 明天還是把書帶回公司吧。

在家讀書

今天甚麼地方都沒有去，留在睡房中。不知為何，整天都很想睡，睡到中午、下午，只要拿著書，很快就睡著，晚上反而醒了。



今天差不多中午起來，就拿了「阿呢」看，看到晚上才看完。然後想，第二本看甚麼好呢？拿起了《生命裡的家常便飯》，是方太的口述自傳。

方太 1982 年開始在亞視教煮餸，教了十幾年。記得小時候家中看毛線，下午做「方太」，我媽就會拿著黑色硬皮薄，一邊看方太煮餸，用心地寫下筆記。有一次訪問古天樂，他說阿媽也有看方太寫筆記的習慣（一度懷疑是不是接受 lisa 雜誌訪問才這樣說！ :p），但年紀愈大，煮菜的款式就愈來愈少了。

那個年代，很多媽媽，一些是半懂不懂，或者也懂煮飯的，藉著每天看方太煮餸節目得到靈感，讓家人都可以在晚上吃到有新意的小菜。我阿媽話以前d 三文魚頭都是沒有人買的，方太教煮之後，這些下欄野就賣得愈來愈貴！雖然後來大家都嫌方太煮餸落太多油（還記得她成殼油倒落生鐵鑊的畫面），後來又換了那些有紋的易潔鑊，特登落少d 油，到後來仲收山了。方太退休，但她的節目，仍然是 80 年代成長的我的重要回憶。

明天上班，沒這麼多時間看書了。這九本書也未必一定睇得晒，但就算漫無目的也會繼續讀下去。

Book Fair Report 2010

今日去完維他命水 event 就戴住 will 幫我化既妝坐小輪去灣仔書展。坐緊小輪時，前同事 f 提我要在 new wing 入，唔使排隊就可以入去。其實我前幾日係約左舊同事帶我入去，所以都唔使理邊度入快 d ，wakaka。不過我去到先知原來佢病左想返屋企，但因為約左我所以等我入埋去先閃，真係有少少唔好意思呢。



其實我今日有少少低氣壓、又唔記得戴外套出街，所以作戰能力好低，行左 2 個鐘就已經頂唔順，要「啪」一隻雞脾頂肚。呢隻咁潺弱既雞脾都要 HKD 22，因為間舖有賣熱狗，我囉左 d 茄汁同芥辣黎擠，餓到連皮同雞軟骨都食埋……


最後我買左以下既書：


（上排左起）
（1, 2）倪匡的散文集國文版，買黎睇下 d 老人家講乜。rmb 對 hkd 一對一
（3）ben 的 blog 講過好睇，天地圖書 booth 買，8折
（4）沙津話呢本好睇過「打份工啫」，姑且信佢！~ 皇冠 booth 買，8折

（下排左起）
（1）因為韓寒，wakaka。三聯 hall 3 個 booth 買，8 折
（2）Lisa （方太）自傳，三聯 hall 3 個 booth 買，8 折
（3）大廣東（上、下集一齊買）好似 $159
（4）力史幾絕都有……好多年前買了第一本「力史幾狼都有」覺得幾好睇，所以繼續買。明報 booth，好姑寒，只有九折（八五折？！）

因為舊年買的書好似只睇了一半，新年返大陸買的書都一樣，加上狀態麻麻地，只係買左咁少。之前我講過想買健吾的《星光大戰》，但我唔記得記低必間出，又只係見到佢其他書，就無買。如果過兩日得閒又有 mood，可能再去一次。

紫色維他命

又到 happy weekend，今日我去左一個好得意既地方，影左好多相s，想係呢度同大家分享下 :p

今日去左 TST ISquare 3 樓 潮拍「型」地，係 Glaceau Vitamin Water 舉辦既活動：


wa, 好多好多好多人排隊！究竟係做乜既呢？


唔知你地有無飲過 vitaminwater？起初係 pr send 去公司畀公司同事一齊試飲，我就 7 隻色都飲齊（首選甜甜地紅色、次選酸酸地紫色、第三位係青青地綠色）。有時唔想飲水 or 茶咁齋，但平時 7 仔賣d drinks 又太甜，飲佢地就岩岩好喇~


當然唔係試飲咁簡單！去到 潮拍「型」地，會有化妝師化妝，再影造型相。其實我去到之前已經輕輕化左少少妝（粉底、胭脂同唇），化妝師就重點幫我加左眼妝，成個 look 即時唔同左！~

化妝之餘當然有偷師啦，我去既時段岩岩 Will Wong 係度，個妝係佢幫我化既（wakaka），八卦既我當然即時記低佢用左乜：

眼線（clarins 眼線線 + tatoo 眼線液）、mascara（mj + max factor），另外用左啡色眼線加少少輪廓

Will 教我首先用眼線筆畫好上、下眼線，然後再用眼線液o係眼頭、眼尾加深，咁眼型就會好 sharp。我平時係好少夾眼睫毛，今次 Will 就好有心機咁幫我夾眼睫毛，之後先搽 mascara！~


haha！我和 Will 的合照（被圖左兩位女士指指點點 -.-）



另外我仲同著名填詞人甜甜合照~


近睇呢張就係我化妝之後既造型照。唔知我呢排瘦左，定係 photop 影得我瘦左呢？ good！


甜甜話影相既 photop 係幫 RB 隻碟影 cover 的攝影師（佢話唔關佢事架，你信嗎？ :p）

如果你都鍾意我呢攝相，記得去呢度投我一票！~

見到人地同男朋友仔、同屋企人一齊影相，真係勁 sweet呢…… 如果你都想影，glaceau 下星期將會移師銅鑼灣世貿中心門口同大家繼續影，另外仲會有一架車，周圍巡遊同大家影相，有緣既就會撞到！~

魚之樂

尋日同 L 睇左套戲叫 fish tank ，其實佢養左好多海鮮，如魚、蝦、蟹、龜，佢話得閒要放出黎行下，唔係好悶。

S：放左出黎又執唔番，我記得你話過 d 動物由細到大係籠度，根本無自由呢個 concept 係我自己諗出黎。

L：係咩？應該唔係我講架喎。

S：我記得你講過（係咪其他人講的以為係我）……唔係，係你講的。

L：係咩？可能啦，但呢一刻我唔係咁諗囉。

S：……


當年佢咁講我係有諗左好耐，之後我成日提醒自己唔好將自己想法套係人地身上（因為好乞人憎）。

後尾我諗番應該係莊子千幾二千年前個句「子非魚，安知魚之樂」同出一轍。

L 好似是真心失憶。不過都無所謂，其實我都係怕悶。（我熬底了……可能真係唔係佢講的？）

魚缸

poor！今日因為黑雨準時放工，約左 L 去睇戲，我放工盡快去，由公司仆去電影中心，但去到佢仲洗緊頭，電話都唔聽，到佢聽電話時畀我鬧爆左 -.- 結果都睇唔到原先諗住睇的戲，睇左 fish tank。

那 fish tank 是類似 mockumentary 的戲，講英國一個好似公屋的地方裡面一個單親家庭的女仔，阿媽成日掛住溝仔，佢就通街遊蕩……那片實在太寫實了，平淡如水，睇到 2 / 3 平時唔鍾意人地睇戲發出聲浪的 L 也忍不住爆了一句「無 劇 情」wakaka，最後的場口那女主角由屋企跑落樓 / 在荒地狂跑，那cam man 又跟，睇到頭都暈（又想嘔 -.-）真是闔埋眼 feel 算了。

對套戲雖然是有點不滿但畢竟是 okay 的，平時很少自己一個人看電影，現在我飯腳都少了 -.- 所以也是非常難得今天可以即興睇了一齣電影的。

其實今日好累，心情一般，就講到呢度好了。

情何以堪

今日因為打風，好快就放工。依家十點，個hk toolbar又聽不到收音機，好鬼悶，但又有少少累，不想再睇電視劇或者打機了。

咁又一日。

尋日用左差不多成晚去睇番自己以前的日記。大部分係分手之後寫，負能量極重，到我換左寫呢度，生活多左變化，開始提醒自己要寫d 正面野。公司開始要求寫 blog，d entry開始有主題，先至將之前負能量漸漸洗去。

那時的傷心已經過左，甚至唔記得左，尋日睇番，先知原來曾經咁長時間咁辛苦。依家就算有開心同唔開心，大部分野都可以笑笑口面對，其實是一件好事。

某人成日無啦啦話「情何以堪」，其實都有 d 道埋。成日畀感情中傷，就好似不停輪迴超生咁，試問又有幾多人有勇氣不停衝埋去飲孟婆湯呢？

也難怪咁多人選擇（被選擇）單身。

舊文番貼：傳媒人的反思（070104）

前天在公司見到同事L，與他分享我的旅遊相片，之後他問我有無寫blog，然後概嘆：甚麼都可以免費放上網，寫文字不是賣錢嗎？

我知道他說這句話不是衝著我而來，然而他這樣說，的確讓我感到愕然，也有些感概。互聯網的確給予一些「業餘」及「非專業」人士一個所費無幾（免 費）的發表空間，加上讀者不受客觀環境限制，身處何地，只要找到路徑，就可以隨時造訪觀覽閣下的作品，方便至極。這些業餘作品的平台，給予很多人「一鳴驚 人」的機會，甚至從此平步青雲，因此「出位」、「出書」、「出人頭地」的也不乏人。

這近年新興平台是否對賣文者、甚至專業攝影師帶來很大衝擊呢？實在很難說。不過我認為作為一位賣文為生的人，應該更好地裝備自己，讓自己變得更 專業，才能找回自己的定位和生存空間。事實上有沒有互聯網，人們對文字工作者的尊重亦很有限，覺得識字就可做呢行，或者自己也很勝任，感覺上，很少得到別 人真正的尊重。網上平台，只是警醒我們更加自覺、更有力地做好自己的工作。而是否要免費把文字上載到互聯網與人分享呢？哈，我的blog十局其九都是吐吐 苦水，抒解悶氣，大家畀面捧場已經萬幸，當然不會覺得蝕底左啦！

過去的我

今日放工忽然想睇下以前 blog （o個時好似未叫 blog）寫過 d 乜，於是去睇番我在 window live 寫的日記。

日記由 2005 到 2007 年（07之後轉 o左呢度寫 blog，因為當年 window live 打字是忽然不能同步出番粒字出黎，so stupid！）， 發現原來 05 年仲好鍾意睇漫畫同動畫，有 dealth notes 同埋 美鳥日記 o既 entries，之後又有拍拖所以寫得好疏，之後又見到一些唔同工作環境，顯示自己那個年度 （05 - 07）係做過 3 份工咁多！

以前寫o既日記真係日記o黎（逐件事記低），近年大家寫 blog 模式已開始轉變，例如，會有美容 blogs、煲劇 blogs 唔同類型，entires 亦要有唔同主題s ，比較顧及讀者感受，亦都追求互動。想當年讀書時我試過開過一個 opendiary account ，特登用另一個身邊寫日記，再識一班日記 friends （大家都不揭露身分、不問資料、不 add icq……），當年剛學識打字o既我就係靠住自己緩慢o既打字速度，逐日抒發自己感想。

時至今日，呢 d blogs 雖則都係談天說地，但都會有好多人睇到（熟和唔識都不怕，最怕是那些半熟的，件事很令人尷尬），所以網誌內容都比較平和一點，少些「不節制的感性」entires。

當年除o左番工要開夜，幾乎每一日都記低自己o既心情。今日值得記低o既事，就係重溫昔日o既日記。

炒飯的藝術

放工和 d 在 jusco 附近吃「吉野家」呢排賣期間限定燒牛肉飯。

40幾蚊的飯是這樣的，有牛肉、玉米、洋葱、甘荀（綠色忘了是甚麼）、燒汁、飯，但不含飲品。


我先將牛肉的面燒熟，下燒汁，再下蛋，見蛋白變成白色，再下飯，再淋上燒汁，之後煮成這樣。我覺得如果個炒到有少少飯焦，雞蛋唔好咁熟會仲好食，但我又不想蛋同飯撈得太勻，但實在唔知點煮。

我想，應該先將牛夾出黎，然後先下飯、再下燒汁，煮到咁上下才下牛，然後再騰出空位（不要咁快撈入飯中），將蛋白煮至實色，僅僅熟時再將所有材料混在一起？

不過 d 說，食這些都是貪得意，應該不會想吃第二次的吧？！

這兩天我到商場的玩具部，都見到稀珍的同類，它們還未出世，我看到一個又一個小動物在透明的蛋仔裡面，好可愛。 Jusco 又有一隻 display，站在燈箱裡面。

那明明不是稀珍，稀珍的嘴是歪的。近來常常打聽它的消息，其實我不應該再問了，好像有點影響了別人。其他的玩具都是和我玩一陣，然後淡出我的世界，只有稀珍需要承受我的心痛與不安。

有得睇冇得__

今日同個 fd 講開，佢平時好鍾意「目及」仔，今日仲話「我好鍾意睇示範單位架，好開心！」

對於我黎講，以上兩樣我都零興趣，最多都係見到靚野，有時會影低留念囉。得個睇字，完全滿足唔到我，都唔知有咩好咁好睇…… :P

一天假

星期六竟然整天在家，也好，要「過冷河」啊，不然工作會超辛苦。

今日整天留在家中看偶像劇，有些情節好傷感的。

荼毒

呢幾日都比較夜瞓，所以朝頭早都好辛苦，到了 1500 食完餐晏先覺得自己醒番！話時話都幾多野做，整呢整路又到放工。呢排做野不盡完美，我想自己應該可以做好 d 。猶幸我工作經驗都不淺，我覺得心理上應付到的，總之有機會都希望做得更好。

放工同師姐去食粥清腸胃（因為佢食太多野食滯左 :P），之後我地在街上撞到好多熟人，師姐好明顯超雀躍，但要放假唔可以星期一講畀同事s 知，所以我將件事貼左係 fb 推一推舟~

回家在 msn 和師兄傾偈，佢都唔得閒理我。師兄話佢在 yoox 網購心儀時裝，上面正季度減價，我又八卦上去睇……嘩 d 野其實又唔貴，仲多到呢……有 d accessories 同銀包平到 3-4 折，襟個掣就買左，都幾毒吓……

今晚繼續 sammi 之夜，最愛 sammi 的年代係 1992 年 << never too late >> 隻碟啊…… 今日 fb 轉貼左前同事 a 的一個 post，係鬼佬唱海闊天空！好掛住家駒。師弟話家駒o既哥 o既 style，前無古人……但我比較沉醉於自己情懷。

Sammi、家駒的 90s ，好懷念當時o既感覺，因為所有o既感受來自 cassette 帶、CD、收音機同電視，單向接收，自己詮釋。前日又同前同事 k 講起 web 2.0 ，其實我成日 fb ，但我知呢 d 野令到世界大同、令到我地好易畀人煽動、令到我地好難同人地「唔一樣」。

我寧願自己鍾意睇書、沉醉o係自己o既世界入面，但事實係身不由己。

其實呢隻開始係較後期既作品了，不過今晚 sammi 之夜 part 2 剛聽到呢隻，就貼呢隻啦~



今日 entry 由朝講到晚講到好詳細咁，意外地體會到o係新陳代謝自然流失之前，好想好想記低呢一刻心情o既感覺 ^_____^

超 B 匙

呢個星期真係忙得好緊要，忙到去不到event，但我覺得都okay 既，因為有些事情是更重要而需要完成的。有時候，有些我知道不會有人催促我做的事，我會放係度由得佢唔完成，其實呢種惰性並唔好，希望我做野更有動力，做得更好。

尋日真係好depress，鴨仔又寫信畀我，佢發現我尋日 last post 係 3 點幾。於是我又回佢信，跟住我先發現原來鴨仔寫書面語，佢唔係 HK 人，其實我寫左好多野佢可能睇唔明……不過算啦，都是為了抒發感情，如果下次鴨仔再來信，我要提醒自己，寫返書面。

不過，我更加希望鴨仔解開心結，唔需要再寫信畀我。

鴨仔你要加油啊！（呢句一定睇得明啦 ^__^）

雖然返工好多野做又遇到挫折，其實好多野都唔上心，因為 sad 緊另一 d 事……今日我同同事 flashback 返以前既我，其實好大部份呢個 blog 有寫 o既，就係舊年參加 speedmate 活動的所見所聞啦，另外就係再 flashback 前 d 既……哈哈，佢地覺得幾得意，其實我覺得雜誌訪問點解咁好睇呢？因為一個人將佢人生最精彩，最值得記錄o既事講畀你聽，一定好睇啦。就算以前令我非常之唔開心 o既事， e 家講返都可以令人覺得好好笑，當然這是需要時間經歷而來的。

雖然好多事都唔可以控制而令人無奈，但我相信會有更多好好的事發生呢。希望日全蝕帶來的負能量快點離我而去吧。

今日做野時想聽一些 80s 的歌，但點知找到這首……似是 80s 的人讀書時聽過的歌多d …… 不過貼在 fb 都有兩個 fds like ，haha，這裡再貼一次啊。

再見了，稀珍

前幾天，我把稀珍放走了。尋日我諗起，稀珍可能已經o係垃圾筒，可能去o左堆田區，可能同冷飯菜汁一齊，就無以名狀的難過。我驚要面對一些我不想知道的事，不敢上網。

今日我想，其實我是可以選擇好好收起牠，可是我沒有。但我依然感到很難過，但我今天和昨天不同，我想著這件事，一直不想睡，直到現在已是三點。


稀珍是卵生的，但我已經唔記得是邊度扭蛋扭出來（好似是太古城宇宙船），這張相是牠出世後不久拍下來的， 5 月 14 日，到今日剛好是 2 個月零一日。

再見了，稀珍，我不能日日掛住你，因為我唔可以日日都唔開心，我會把你放在心裡面的一個角落，有時會想起你。

捨得

今日多野做到，放工先可以睇新聞。其實多野做都好的，今日將好多好多濕碎的事完成了，不過，都仲好多野未做。做起大部分野之後，可以影張新相──「新」工作環境的整齊狀況畀大家睇 :)

臨放工我的另一個鄰居 msn 我，話見到我在屋企樓下講電話唔肯返屋企 -.- 今晚佢同我講o左一句說話，佢話「一個人要變，係無得解o既」，唔記得邊個都講過同一句說話。我估好多人都有類似經歷，先會咁感慨。所以我嚇親，都唔需要太自責。

這一期的雜誌差不多完成了。其實已經好耐無在雜誌見到我的稿，呢幾個月才開始再次見到。今期有最多我的稿呢，hoho。這個 issue 我寫了一篇訪問稿。被訪者常常強調自己有自己一套人生的步伐，令我覺得她很懂得在適當年紀做適合自己的事。我當然不會完全同意她的想法，但是，她令我想到，甚麼年紀做甚麼樣的事，不要太迫自己向前，就算留戀，我們也會不知不覺地跟年輕的自己告別。不急不緩，才是最善待自己的所為。


杭州見到一間舖頭，十日之前影的。

有個朋友成日同我講，話佢成日都好開心，希望身邊朋友見到佢，都會一樣覺得開開心心。成日咁提住，我真心覺得好煩氣，次次聽到都不自在。

正如影低這張相，都是因為心裡的不安。要成日提住自己捨得，其實是因為不捨得。

開解別人

回家發現電郵信箱裡有一封信，有萍水相逢的人看了我昨日的blog之後，和我分享她的感情事，想聽些意見。其實我也一些想一抒己見的想法，於是打了電郵回她。我覺得作為女生，最緊要懂得如何對自己好，很多男人，分手要扮優雅，講體面，還不過是迷戀自己個人形象之故。為了那些自戀的男人傷心，實在不值得。

我不是覺得女人要嬌矜高傲，只是用不著成全別人犠牲自己。

除非你無以名狀地，真的很愛很愛他。

我想那個寫信給我的女生，心裡已有了事實的輪廓，只是不敢親口督定而已。

幻想有多美好，現實就有多殘酷。之所以佛教教義導人無喜則無悲，就是這個意思。

今日聽了講九型人格（ennagram）的電台節目，其實我對這話題有過膚淺的認識，但最後沒有深入地研究，也沒有想過用ennagram去閱人。我個人對事情的傾向不大強烈，很難stereotype自己是那一類人。

如果硬要我坦白地將自己歸類的話，我會說，以前的我是極端地感性，而且對於自己的極端感性，沉迷到引以為傲的地步。但現在的我會努力從理性的方向思考事情。

為了生活，我需要踏實一點，因為人的抵抗力有限，但現實很殘酷。

純粹抒發感情的幾句話

放假回家已差不多一個星期。在旅程遇到一些人，本來好想寫寫，但沉澱了一星期之後，我已經不想再寫了。之前一段日子，為了不要悶親我的blog的讀者，會故意寫些有趣的東東。這幾天我覺得很累，我覺得這裡，純粹用來抒發感情好了。

昨天約了朋友夜遊，今朝本來想出外走走，可是身體負荷不來。十一時起床，一直處於「彌留狀態」，到十二點多，洗了澡，衣服穿好，還是要跑回床上睡覺，睡到晚上七點才起床。哈哈哈，年紀不輕了，真的要多睡，不然好傷肝的！大家也要好好保重身體。

今天和以前的男朋友聊了一些無聊話，雖然我們一起是很短的日子，但是我們不久也有見面、聊天，或者有時想起他，我會覺得很高興認識他。很多我曾經好嬲好嬲的人，或者逃避過的人，我都不想或不敢再面對，而他是非常之例外。希望十幾廿年後，我們仍然是好朋友。

補貼這張照片，浦江飯店（圖中），十年前住過的地方。

感謝你們的正能量

昨天整理旅行照片到五時，今天早上十一點就在公司出現，原因是出席公司的比賽頒獎典禮。這個為大學生和大專生而設的比賽，為其差不多半年，在我入職時已經進行得如火如荼，同事們常熱烈討論，我今天還是第一次見到參賽者們，可惜已是訣別時。

他們經過幾個月的活動，彼此已經非常熟識，頒獎禮上，大家在台前講得獎感受，有大方得體、真正流露的，大家都做得好好。看到他們雖然是undergrad，都很外向，陽光，充滿朝氣，自信暴棚，我在想，在大學時我還是一個薯仔。能夠在大學時期已經這麼外向，見多識廣，真幸福。

看到這班未被職場洗禮，滿有志氣的大學生，刻下忽然感到非常感動，充滿正能量。這幾天在身邊發生的事，都令我覺得人生滿希望，能夠感受到大家的氛圍，我也是非常之幸福。

下午，我去了前同事a 的家看她的bb ，bb還未滿月，整天在睡，哥哥就活躍地跑來跑去，他對我說，係啊，我唔認得你啊，很多話。能夠和小朋友說很多話，覺得好開心。他在執拾玩具時，執得好慢，我問他（其實有少少是自言自語），你執得咁慢，係咪諗住執執下有人會幫你執？！佢很快地答：係啊。然後大家笑他，他不好意思，用手遮面，然後話：我好眼瞓，現在要去瞓覺了。好像無地自容似的，真的笑死我！haha！很喜歡小朋友的率真，之後他執到一半，我沒好氣地和他一起執玩具，wakaka！又一會，我自他在摷玩具，我站在後面看，然後他不小心撞到我，立即講了句sorry。可能我少見多怪了，我覺得有家教的小朋友真的特別討人喜歡，希望他日日開開心心，快高長大，時時讓爸媽一樣和他開心快樂。

在別人家逗留了好幾小時回家，晚上約了朋友夜遊，和一年不見的d 去飲野。飲了不夠一杯，她就說，很睏，我好像不屬於這裡，好想念陽光哦。我何嘗不是一樣？或者人大了，就不再屬於那些煙花之地，這種轉變不能自已。回家時，我把近日發生的事告訴她，她說，如果這世上還有事情可以影響到你的情緒，無論開心不開心，都是一件美好的事。現在的她，好像甚麼也無可無不可似的。可能是荷爾蒙的錯？其實人真的很容易被身體狀況所影響，好像這幾天，心情好轉，難保過幾天自己又烏雲蓋頂起來。

所以要常常提醒自己，珍惜快樂，不要讓幸福的感覺悄悄溜走。

一刻永久

這幾天的生活以工作為主，其他時間都是瞓覺，因為病還沒有全好起來，而且工作比較忙。除了工作，就是和朋友聊天，也沒有很多有建設性的事做了，所以若覺網誌特別乏味的話，實在抱歉！

今日和師姐聊了一會，她覺得以前友誼深厚的好姊妹，現在感情不復當年，有些欷歔。我跟她說，我們一路成長，有些人會愈走愈遠，也是很正常的。可是當年那曾經親厚過的關係，也的確是真實存在過的。

很多東西，我們不能永遠擁有，所以也應該好好珍惜當下。此刻我的生活、工作種種，雖然也有不由自主的部分，但很大部分都是我忠於自己的選擇而得來的，應該好好感謝，自己的決定，以及讓我擁有這些好東西的人。

凌晨3點的可樂

幸福吃了兩天半，終於為我帶來丁點幸福，似乎病菌已離我而去。

其實我認為那藥的真正作用是，令人即時不頭痛、不咳嗽、不流鼻水，然後，讓它的安眠成分，帶你進入另一個世界，忘記塵世的種種。

然後，當藥力失效時，你才發現，被世界隔絕的你，已經靠著自己的力量，逐漸好起來了。

剛感覺好起來，凌晨三點正喝著可樂。很少把工作帶回家的我，盤算著開始工作。

此時，又剛聽到朋友告訴我的小小幸福心事，替她高興的。

瞓飽唔會餓

話說回到香港就running nose + 咳，這種上海菌好像跟香港菌有些不同，但我還是用同一種料理方法。回港後臨瞓「啪」兩粒幸福傷風咳素，前晚吃了兩粒，九點幾醒來再吃兩粒；昨晚九點幾才回家，吃兩粒一覺睡到今朝八點幾。

昨晚瞓覺時，本來有掙扎過「食唔食啲嘢先好呢？」，但想食媽媽w同囝囝講的一句說話：「瞓著咗就唔會肚餓㗎喇！」於是試下，都work喎，但可能長期咁做，唔係太好，因為新陳代謝會慢，會變咗老人新陳代謝速度。

返香港兩日，都係返到屋企即瞓，冇生活。呢幾日返公司都勁多outstanding嘢未做，做完呢個weekend會休息一下，雖然，太得閒對我來講未必係一件好事。

病了

自從前天在朱家角忽然下起大雨，第二是清早開始就有點生病的感覺。今天雖然病懨懨也去了兩個發佈會，成積算是很不錯。

又要病，又要有好多野交，這個星期不會易過，努力。

這次旅行沒有帶稀珍同行，但我在旅程裡都想到它。這次沒帶它去，它好像有一點抱怨。現在假期已經透支，下一次旅行，已不知要到甚麼時候了。

在上海的浦東機場，我買了一只新的毛毛熊貓，我叫它做凱凱，因為它是從上海買回來（叫海海好像和海寶太似）。可能是我太沉迷和鴨仔在一起，現在好像沒有那麼鍾意鴨仔了。

f 說我不應煩惱像小女孩一樣。其實我知道心裡面那個小朋友不肯長大，但現在世界承受不到她。她雖然任性，常常撒野，但都知道哪些人，會無條件對她好。到現在我還不想，她有一天會被迫離我而去。雖然她在，我會下意識不想面對殘酷的現實，但我仍然好希望，她能常常待在我身邊，聽我說話。

小女孩，別離開

剛剛回家

和鄰居的上海世博、杭州、朱家角五天團剛回來，由於上海班機慣常延誤的關係， 到翌日0200才返到家。這旅程算不算賺了一日呢？

1800已到了浦東機楊，單是check in 已花了一個小時，但還是要等到2200才能被安排上機。鄰居問我滿意今次旅程嗎？我覺得幾好。旅程中有看過風景，也有共同渡過的時光，一起踏足的名勝古蹟，雖然也有意見不合的時候，但以上種種，全部都是非常真實而值得銘記心上的。

平時與鄰居風花雪月，談工作、生活都很投契，但一起出遊，才發現彼此的lifestyle落差真的太大了。我跟她說：「我們還是不要再一起去旅行，平時飲茶吃飯好了。」她也非常同意筆者的說法。

這句說話沒有骨，就是因為我們認識六年了，有些事情，大家非常明白。

但這次旅程當中，我的負能量真的太重了。對於鄰居要被迫接收我的負能量，我感到深深的抱歉。旅程當中我沉澱了很多事情，我想一個人努力的成果是有限的，做過的事情也未必一定有方法彌補，像有天在精品店門外看到「時光是回憶的橡皮擦」，每天不斷發生的事兒，無論體質好與壞，這些事情，都會隨著時間，或會成為身體的一部分，或會像新陳代謝一樣漸漸流失。

但我還是需要好好生活。

今天有一件事情十分值得記下。今天乘的士經過我十年前入住的旅店，想起十年前渴望自由的我，一個人坐上火車，第一次踏足上海，天氣冷得噴水池也結冰了。還記得當年這間旅店是青年旅舍，多人間一張床的費用是RMB 60，當時的我還覺得有點貴（平時住的一床是 RMB 30-45），浴缸還是超殘舊的，湖水綠色，有四隻腳那種，只有水龍頭，連蓮蓬頭都沒有，於是在超凍的天氣下，到街上買了個膠盤子來淋浴。

因為當時還未流行數碼相機，很多事情沒有用映像記錄，印象變得模糊，但那份感情仍然非常實在。其實我連飯店的名字都忘了，今日經過外白渡橋，看到飯店，感覺十分震撼，我在網上找到飯店的資料，發現飯店已被收購和「活化」，變成了古建築特色酒店。

網頁這樣寫道：「浦江饭店原名礼查饭店，始建于1846年（清，道光二十六年），是中国第一家西商饭店…… 1922年，著名科学家、相对论创立者爱因斯坦曾经住过礼查饭店。当年入住304房……2002年浦江饭店完成第一期更新改造工程,并全部投入使用,改造后的浦江饭店青春焕发。」

現在最便宜的「豪華大床房」標價是RMB 1,280，果然是煥然一新了。

這十年的我，遇過很多的人和事，雖然我自評不是一個容易記取教訓的人，但是今天重遇當年的我，並不覺得陌生。由於吸收能力不足，有些事情真的要經過很多年，才明白當中的底蘊。想到這裡，好像一切也不再重要了。即使仍然會繼續跌跌撞撞，我還是那麼喜歡我自己。

鴨仔

原來上一個post是第 666 個 post。


現在只好變成一隻鴨仔了。