累到嘔

前排有同事累到想嘔，我尋日真是感同身受。尋日天氣好熱，一早起身就番公司整少少野，然後同同事一齊塔的士去同公關食飯，食咗好多野，仲有生日壽包食。跟住兩點左右去了做cover shooting，其實只係負責拍花絮，唔使訪問但係幾十個人困o係一個高樓底的密室度，行行企企都會好累。咁就過了大半日。跟住幫同事囉一袋衫番公司，其實在工廠區過幾條馬路唔算好遠，但係袋衫顯得好重（有個同事仲一手一個大喼真係唔知點擰），番到公司個人好似無咗半條命咁，但都唔為意，求其搞少少野七點左右就坐小巴番屋企，一番到屋企除咗con洗咗面就瞓咗瞓到今日中午。起身時覺得個頭好痛，覺得一定係瞓咗十幾個鐘瞓太多的結果。阿媽叫食飯就照食，跟住我話頭痛，她就叫我食頭痛藥，我覺得好唔make sense，因為我深信自己無病，就算有病我都相信身體有自癒力唔可以咁輕易食藥的。最後我真係又頭痛又嘔好似平時偏頭痛咁，結果我瞓咗一個中午之後晚上起身，食完個飯出吓街散步應該慢慢好起來。

做到咁疲累都唔知為乜……其實唸到最簡單番工就係為了份糧吧，好容易解釋到件事。我近來在想搵多d 錢係咪可以保障我中年到老年可以有安穩生活。其實都未必係，有錢，有健康，其實唔容易，點解地球人生活咁難？定係年紀大了生活愈來愈艱難係必然？個世界只會屬於年輕人？似乎真係好難解釋得到。

趁住仍有健康，要好好珍惜生活。