再度購置 bamboo

今日與 r 行上山頂遠足，行完後我去了灣仔電腦城買 wacom 筆。細個時非常鍾意畫畫，幾年前見 wacom 的 bamboo 五六百蚊幾抵玩就買了一塊，可惜過一段時間就壞了（忘了用咗幾耐有否過了保用）。近來因為愛玩手機經常刷屏，食指開始有些痛，加上又想用筆輕鬆畫畫（大概呢個電代 scan 畫已經好 out... ）所以就想買支筆玩下。

甫入腦場就周圍格價，第一間話要二千幾，細塊都要千幾……我話我記得以前買係幾百蚊，sales 話無可能；另一間無貨留電話；再去一間人流多的話 850（pen n touch），終於接近我心目中的價錢，之後再問幾家，有一家話 900，我話我問過一間 850，佢話無可能，仲話自己同個代理好熟， up 了代理個名出黎，又 sell 我買沒有 touch 功能的另一款……話 touch 其實唔好用……再問多間都係 900，於是就去了 850 蚊那間買了回家。

回想之前有 sales 話「無可能平過一千」，又有 sales 話自己同代理好熟無可能平過自己，真係全部 9 up……另外行二樓時一塊畫畫版都見不到，但就有 sales 主動問你想買乜？又話隨便問，問路都得架……我已經眼見佢無o個樣野賣，唔想採佢……

其實作為女性走入腦場難免被老點，格價的過程是絕不開心和煩厭，但為了買到想用的東西還是硬著頭皮問了好幾家，最後我相信我買到的貨價算是合理的吧？！相比幾十蚊一隻滑鼠一塊八百幾蚊的 bamboo 真係非常之貴，加上得來也算不易，要好好利用。