釋放負能量

呢排負能量好高，為咗健康我決定在此釋放一啲，不喜勿看。

．上一篇 post ，好驚會變 post of the year，在我的生活中勁 loop……（已有最少三個 target）
．又買 iPhone ，又係無乜開心嘅感覺，一來好貴，二來部機同上一代勁似，三來又係因為工業用因素而揀佢，充滿無奈感
．返咗新工三個月多少少，強烈感受到做 digital 工作機會多過做書好多，但係份工亦唔穩陣好多（雖然朋友曾經做紙媒都好唔穩陣）
．又係工作，做咗網站愈來愈少機會寫長稿，我懷疑我無長稿寫無訪問做會抑鬱
．雖然我識做好多嘢，但係更多嘢係唔識做。但係 most of all 最賴嘢係樣樣識少少，但係無話無咗我唔得
．老公養唔起我令我對生活非常擔憂
．我對錢嘅敏感度低令我理財能力好低，「跌」好多錢，但其實我好需要錢

眼前嘅嘢已經夠衰，未來嘅不可知已經唔到我擔心，不過我相信今年點都好過舊年，最緊要係平安同埋健康。

買你怕

通常我都好少仇口，好少同人交惡，自問底線好低。

如果我憎你，我直情會買你怕，驚咗你。如果有個人俾我呢種懼怕嘅感覺，經驗話俾我知係冇可能番轉頭。

唔好再走出嚟嚇我。

2014

2013 年終於都完了。我想很多最好和最壞的事情都在這年發生了。有些事是那麼垂手可得，但是令人感到無能為力的事情就更多。

其實我覺得盡力做一件事並不是我的風格。我覺得如果要出盡力才達到目的的話，那些事情或後果並不是自己應得的，或者這令到很多人認為我這種態度不夠進取，我想每天唯一可以做的事就是做好自己，那已經很足夠了。

還有一件事就是我經常都揀容易的事來做，不熟識的範疇的事很多時都被擱在一旁，這令我的生活形成很多缺憾。

2014 年除了懂得選擇之外，亦要坐言起行，希望那些不幸的事情會遠離我而去，今年過得比去年好。

懺悔文

我覺得我做野都算快手，但係容易分心程度係正常人二倍以上。

其實咁我都可以存在世上的，但係就少左好多人生樂趣。

不過現階段的我，瞓覺係非常重要。

晚安。

錢作怪

當老公一日到黑話要賺$的時候，我也一日到黑發窮惡，跟住家裡好多事情令我看不過眼。本來心入面已經唔舒服，當我臨瞓想煲兩隻蛋食時，發現蛋架入面有幾隻裂了的蛋，阿媽都唔捨得掉。。。。

其實我都無能力令阿媽對生活安心，仲食緊佢住嘅飯。講到尾唔係乾塘所以熬底，而係對未來無信心所以恐懼。

開心過日子真係唔易。

【fb 貼文】金山阿伯客串楂的士

今朝我晏左起身返工，諗住等過海的啦，點知個的士站半架的士都無（平時起碼有三架），正當我灰到爆之際，大路上突然有個的士阿伯向我揮手，於是我就上左佢車。上車我話要去壹傳媒大樓，佢話唔識，我都無為意，因為 d 司機通常都話唔識去，咁我話好啦去到我點你，講多兩句佢就講維基，入左東隧，到出隧道佢就轉話題，表明自己金山阿伯身份，佢話佢移左民加拿大，得閒返下香港，咁啱佢兩架的士司機去左泰國旅行，佢唔抵得架車停係度無人楂所以楂出來兜下，仲不只一次強調自己好耐無去過將軍澳，此時我有少少懷疑佢有機會唔識路，但一陣之後佢就上左將軍澳公路，之後條路就直去，咁我就知無機會行錯路了。

此時阿伯囉左一本相簿出來，係佢加國生活私相簿，佢話自己 96 97 時用百幾萬港紙買左間 house，有兩三層有前後花園o個d，我話係咪村屋咁，佢話靚好多，我又話咁係咪山頂 d 豪宅咁，佢話梗係靚過 d 豪宅。之後睇到佢相簿有一對仔女同埋佢同個孫的生活照，佢又認叻話：「呢個我內孫黎，佢好得意好叻仔架。」我心諗個個都話 d bb 都叻到曉飛架啦，又話最近帶左孫仔去唔知邊度旅行（我港女唔識），跟住講下講下佢有少少失落，佢話：「不過個邊好悶架，無乜朋友，可能 d 人要搵食啦，就算去唐人街，d 老闆都要自己落手落腳做野，無人得閒同我傾閒偈囉。」

此時架車開始駛到去邵氏片場，佢話呢度係咪電視城，我話唔係 tvb 黎架，邵氏片場啊，跟住佢見到片場個 logo 就認得。跟住架車去到日出康城，佢好似發現新大陸咁：「嘩呢個屋苑好大！以前都唔見有既！」我話呢度好近堆填區架，麻麻地，補多句：你一陣打開度門三秒就聞到。

跟住過左一陣就到左目的地了。呢個唔識路的士司機都幾勁，行過 d 路講到前所未見咁，結果都無行錯路。落車時我話祝你生活愉快，佢可能覺得我咁好傾，回返我一句，話祝我未來生活俾佢更好。知後我就落車了。

金山阿伯都幾 proud of 佢自己o既生活，可能當佢係屋企悶到發霉個一刻，都有懷疑過自己係咪移錯民。不過睇到香港依家咁，佢心入面都應該慶幸自己執返身采啦。

有些人應該不相往還

前天不知是下晝還是夜晚做了個夢，夢入面一個我不想見到的人打電話來問候，寒喧了幾句才發現是誰（因為夢通常警覺性低），然後匆匆掛線。

其實我是一個很有同理心的人，就算我唔鍾意一個人，都會覺得大家是站在不同立場做自己認為啱的事，很難真心討厭一個人，如果我真心覺得一個人乞人憎（不是因為驚或者逃避），那就應該跟隨自己的感覺去吧。因為人生不能盡如人意的事太多太多了，為何在一些小事上面為難自己？

如果這個人看到，希望他識趣，不要再訂閱了，瀟灑地華麗轉身吧。

留文字

近來比較忙加上用手機比較多所以好少上網打字寫 blog，近況就唔使講喇，一個字「累」，希望我快 d 適應我新工業區 OL 生涯啦！

閱讀報告: 傷悲桑比

個多月前朋友K借我這本王貽興的新書，經過閒時在晚間讀一點，加上坐車也讀一點，昨天把它看完。

朋友說好久沒看小說，這本王氏的小說寫得比她預期好好多，因此向我推薦。或許是朋友的評價令我有較高期望，看畢比書後並沒給我很大的驚喜。不過這書充分揉合流行文化，以及王氏時而揮灑文筆丶時而像百科全書般如數家珍，也令我覺得賞心悅目。

總評：7/10

優：流行文化丶話題性丶故事鋪排丶作者個人魅力

缺：個人不特別這故事類型（魔幻？）丶男性角度（極宅＆毒）丶奇情但不感動

推薦給王粉＆愛看小說但怕太 heavy ＆鍾意 contemporary pop culture 的人們～

Before Sunrise

 今日同朋友分享了 "Before Sunrise" （1995）呢套聽聞已久的經典電影。相隔九年又拍了一套 "Before Sunset"，而又九年後今年又拍了一部 "Before Midnite" 。故事講一對男女在火車相遇後浪漫同遊維也納半天的故事，成套戲由兩個人傾偈傾偈傾偈串連而成。因此故事途中聽著他們不著邊際的漫談我們開始失去專注每一句對白的意欲……更懷疑這套電影過譽。

不過後來又反思其實我們覺得悶，是因為我們早已知道這套戲會原班人馬拍第二、第三集，而當年故事內外所有人都不知道這對剎那戀人是否有機會再次相遇，戲入面最觸動人心的節眼已經揭穿，當然無癮。

其實在每一次旅程之中，當期盼著一切未知的事情會如何發生，那一刻會是最美麗的，因此就算戲入面那對戀人終生不遇，已經相當浪漫。不過有了第二、第三集也有它的好，起碼圓滿了每個人心底的願望，夢想成真啊。

又係淘寶 夜光星星效果

熄燈變藍色，靚到暈！但係會連牆油成塊撕出來，慎貼。

懷舊黑膠

前日在淘寶買了一部簡單的黑膠唱機，今日下午終於到貨，小小輕巧一盒裡，除了基本組件還送了一張用來試聽的唱片。起初不知如何接駁，後來在淘寶客服指導下，於家中找到一條紅白頭輸出，黑色單頭輸入喇叭缐，接上後成功播放，雖然封晒塵的陳年唱片沙沙作響，但效果已夠令人興奮。

不過朋友W就提醒如此便宜的唱機(rmb 190 郵費 20) ，唱針可能質量差易刮花唱片，不過唱片擱著白擱著，用唱機播播音樂也是情趣，也懷念一下愛聽音樂有公子習氣的爸爸 :)

牛皮紙包，入面一層發泡膠

部件和贈品

播放父親大人的陳年唱片

賣鈕

前排同個 fd 傾偈佢話佢做生意係賣鈕，記得小時候媽媽成日車衫，好多衫特別係女裝恤衫或連身裙，D鈕造功都好仔細，甚至有花紋。  

今時今日我地買嘅衫好平，好多鈕都係單色塑料製造。不過佢話一D鈕會用特別物料，例如貝殼丶木料製造。不過佢話一種相對較貴嘅鈕就係用一種好特別嘅物料 : 尿素製造，成本要幾蚊一粒，係D高檔 fashion brand 先會用喎。

咁啱身上有粒貝殼鈕就諗起記低呢件事喇！

試玩黑膠唱機

前排在深水步見到好多黑膠唱片，30蚊一隻唔算好貴，有諗過買部唱機播下，但見 d 唱機唔知 work 唔 work，前幾日心血來潮上淘寶買左部黑膠（約港幣 270）今日或者聽日應該會到貨，到時試播再分享下效果！

高木直子新書

上星期四行過灣仔三聯書店，見到高木直子出左新書，雖然 $90 有少少貴（台幣 240 / 260），但係都忍唔住買左黎睇。

好鍾意睇高木直子的書，佢又鍾意一個人去旅行、跑馬拉松，原來細個又有養隻狗狗，都係我自己好鍾意的題目。呢本書入面隻狗狗仲要同我屋企個隻一樣係哥基（不過佢隻狗有少少混種）

上幾個月睇左佢回憶小時候既「30 分媽媽」都好好睇，佢有一個姐姐一個弟弟，又係同我一樣屋企一樣兩個姐姐一個弟弟呢！