終於放假了

近來夜靜，聽到自己打字的聲音特別爽快，可能因為自己真的定期打好多稿，日子有功，打得特快。不過講到打字字數多，一定不及在雜誌 A 的時候，那時的稿量多，而且熬夜時間多，打到手指都痛。現在相比起來，「字數」真是小兒科。

說回來，除了「日日一隻稿」之外，平時做的庶務特多，例如資料整理、裁相、剪片、錄像。想講講自己錄像經歷，今個星期番四日工，二日包含了錄像的環節，錄到星期四，隻手竟然開始痛，友達 c 話齋，咁錄法真係遲早「網球手」（我也不知是甚麼），總之勞損…… 之後可能好似之前份工咁，要買番隻腳架（但揹住出街好樣衰），或者索性錄少 d……其實平均錄了十分鐘，剪一兩粒鐘，剪出黎只有一分鐘……近來因為公司話 d 錄像要轉去 iPhone 版，因下載速度問題「最好一分鐘以內」的片比較恰當，我覺得一個人專注能力有限，但另一面睇，d 片要多到好似蘋果動新聞咁多，先可以一分鐘一條片又咁覺精采（即是無可能啦）

錄像真是「工人」型工作，又不知從何入手，需要技術又多，而做出黎又好難得到別人嘗識（因為只有清不清，沒有創作性質可言）又講番以前我實在無想過自己會在工作時需要錄像的工作，而且最憎睇人用 dv 錄野，因為又震又 fing，睇到頭暈想嘔，但現在即使是 dv，質素都非常之好。

整個星期都是網站、錄像、iPhone App，另外還有雜誌的稿，雖然只有四個工作天，做過的事比平時一個星期更多，而最吊詭是我比平時早番晏放，連續兩日做了十個鐘。

和友達 A 說，做人要「分散投資」，不能太沉迷工作，但又好似「話人者是」，或者很多事情都顯得太值得逃避，唯有工作能夠帶來「自我感覺良好」的滿足感吧。