兩太互片，你揀邊個？

（如果唔想睇咁大段文又想知我發咁大輪up風想講乜，請睇全文最後一句。）
聽日發生兩件事，一件事係兩鐵合拼，另一件事就係兩太互片。上次區議會選舉因為晏起身無去投票，今次應該會去喇，因為返左咁多日工，一定要出街行下平衡返個心理。投票，對今日既我黎講都算係公民義務，我覺得如果無乜特別事既話，都應該去表達一下自己意見。

我唔想講自己會投邊個，因為心情真係非常矛盾。我自己是做消閒雜誌記者，平時都有睇下報紙雜誌，前幾日睇左本東周刊，訪問葉太個女葉榮欣，佢係度不停咁話，細個阿媽點唔得閒理佢……我心諗，阿媽掛住返工，唔得閒理個女，唔代表阿媽份工做得好囉，咁樣囉人地個女出黎講又暗講葉太其實係無意思囉，又唔會宣傳倒d乜……打開個電腦上網，度度都傳載Audrey Yu個「告急電郵」，通街聽到叫人投票既聲音，無論有定無講出口，最後get到那句都係「告急」；跟住，今日少少得閒打開份蘋果日報，竟然見到黎志英話如果葉太選倒佢會考慮移民……嘩，點解咁都講得出？佢係報紙老闆黎喎？點解做報紙要偏激成咁？

我諗起我前幾個post講開自己買左本書「唔該．埋單」，本書係九七年寫的，過左十年，作者有個總結，係話九七年香港人以為凍結香港，將所有野保持不變，咁就以為會好……直至依家，d人仲諗住自己後八十年代當年幾咁風光，想返返以前個度。

其實，依家我地係咪都係一廂情願咁以為有d人可以帶我地返返以前個度，好似以前咁好……但其實，個社會已經唔同左，一蚊港紙已經換唔到一蚊人民幣，一個七十幾歲既前殖民地高官，你奢望佢可以帶返d咩畀我地呢？

依家邊個官行、邊個議員行出黎係令人心悅誠服既呢？係咪我個人太灰太無知太挑剔呢？真係唔知，我覺得依家個特首只係好過之前0個個，其實佢係咪真係幾好呢？我覺得唔係囉。呢幾年泛民聲勢咁弱，係咪真係因為個個都妥協左，所以全民靠左呢？唔係囉，係d人質素差左，都唔成氣候，又或者其他人同我一樣，搵餐飽飯仔食下已經好難，已經變晒政冷感……我係一個唔關心社會既人，但係今日係忽然有感而發。作為香港人，真係好六神無主，到左呢個地步，係咪一定要信「香港良心」係救世主？