我病了！

前兩日囉左張bupa卡之後，星期四就即病，真係邪爆！我係星期四開始蘊釀，星期五全面病發o既，成日係咁流鼻水同打乞嚏，當日4點終於頂唔順走左落街睇醫生。而同事f就話我g同事a強烈推介ok隔離個曾志明e生非常之ok。

醫生：你咩病呢？
我：流鼻水同打乞嚏。
醫生：你幾時開始病呢？
我：我尋日飲左杯香檳，唔知係咪d酒氣未散就走左去做facial，冷親。同埋我當時發現美容院入面有個人病得好緊要，唔知係咪因為咁，我個facial未做住個鼻已經塞左。
醫生：都有咁既可能既。因為飲完酒抵抗力會弱d，咁d病菌好容易乘虛而入。

（跟住e生同我照下個鼻，check下我呼吸有無問題咁）

我：咁我聽日約左朋友燒野食，係咪唔應該去呢？
醫生：係啊，因為刺激o既食物、辣野、飲酒（又提！），都會令個人抵抗力差d。

此時我已經發現戴左口罩o既醫生對眼係變成左腰果眼，我懷疑係我問d問題太低能，又或者呢位e生不嬲都好親切，以禮待客……我寧願係後者。

於是就咁病左兩日，食完d藥基本上好返，但係d止鼻水同抗敏藥令我進入左「24小時彌留狀態」（清醒同唔清醒之間），連書都睇唔入腦，希望今日開始唔使食佢地啦！

又到點歌時間，今日點o既歌係少爺占o既《我病了》，非常應境。唔記得買《四點水》定係《落雨路》時夾住隻cd，入面就有呢隻歌，好好聽！我平時係唔聽少爺占節目o既，但係都幾鍾意佢d書~ 其中一個原因係佢d校園故事，故仔入面d人放學會o係學校附近行街食野，而少爺占o既學校同我屋企係非常之近，好有親切感！