非常疲累 speed dating

久聞speed dating，亦好多時同fd傾開躍躍欲試，但一次都未試過，前幾日同事c邀請同事們一齊去，而當中我好明顯是「最需要」（想不到另一更適合的詞語去形容）呢項服務，於是我有幸出席呢個盛會，亦大開眼界！

據我所知身邊好多朋友相參加，或者想涉足呢項生意，因此好有信心呢個post將繼「開房男」vs「打種男」之後另一最受注目post！

我好想係自己仲有記憶時將呢件事寫出黎，但我又已經好眼瞓，希望大家睇得明我寫乜啦。

言歸正傳，參加之前，我同同事c最大concern係驚d野唔好食，但實際上，成件事係好辛苦同好o徒氣力同精神，辛苦程度係遠超於我意料之外！

活動情況報告：

活動時間：
都幾長！下午7至10點幾（3粒幾鐘）

環境及食物質素：
都ok！零期望之下，覺得d食物比想像中好食。但由於人數眾多，食物好耐先到，叫野飲又好耐先到，都好在d水添得好快（講到無氣）。環境勁暗，冇燈咁滯，每人檯頭一個白色蠟燭仔，可能特登濛d，大家都會覺得對方順眼d。

活動內容：
幾辛苦！7-8點幾食飯，之後係傾偈時間，是日活動有24男25女，每個人有約5分鐘時間傾，d男人不停咁順時針換位，d女就坐定定係自己個位到睇住d男人係面前轉動，中間只有10mins break，當break時對面都係有人o既，所以美其名係break，實際上都係繼續傾，中間只係去o左幾分鐘廁所，因為難得有得抖，所以我係廁所度有少少唔捨得出黎……亦由於大家好博命咁傾偈，傾得好起勁，好大聲，某程度上係鬥大聲；傾傾下有d身體唔係幾好o既人開始無乜氣講o野，真係好辛苦 :p

出現人物：
都ok！由於d男人係順時針轉動，而我兩位同事係坐我o既右邊，所以d男人一坐埋黎都知道前面兩位係我同事，省卻o左自我介紹o既時間。另外我o既style係唔太鍾意起人地個底，但又鍾意傾閒偈，所以過程辛苦得黎都enjoy。
出現o既男士最多係做政府工、採購員、產品設計師，佔o左超過3成，而據聞女仔從事律師、空姐工作係可以免費入場。其中一男參加者向筆者透露，有一名出席者自稱是life style magazine（！）的記者，唔知邊個黎，哈！
由於沒抱很大期望，我覺得出席的男士質素比我想像中好。會場當中多數男士單拖出現，或者陪女性朋友出現；相反我們只發現兩個男士相識，由此可見男人傾向各自搵食，女人就揀仔都要約埋一齊揀。

結果：
滿意！幾年前已被前同事k封為「扼偈傾」，查實我真係幾鍾意傾偈，真係24位男士我都想繼續同佢地做朋友。雖然話佢地quality比想像中好，但真係好想交往o既感覺真係冇乜。

由於完事已經好累，o係缺乏思考能力情況之下，我將所有男人tick晒。體貼o既大會會o係24小時之內將 match（同時有要求對方資料）o既男士o既資料e-mail畀我，到時我就會知道自己o既成績（不過我估好多男士都好似我咁狂tick，即使有好多人有揀我，都未必係一件好有型o既事，另方面收到我資料o既亦唔值得咁開心。）

賽制檢討：
okok！之前同事f講過，speed dating同普通出去飲o野冇分別，只係坐得入呢個場，suppose每一位女士都係「等你溝」而已，說得再平白不過。講真，比你見足24個男人都好，最後覺得對路，可以繼續交往o既，自己一定心裡有數，所以要reach個量而要畀心機密密傾，scan得愈多愈好o既approach，真係無可厚非。

我o既呼籲係，唔好對speed dating活動有太大期望，唔好諗住咁易識到交心o既朋友，咁o既心態去應該會好開心咁離開；出席一次活動，了解下市場狀況，二百幾蚊絕對值回票價。

後記：
無開名、無內容，上述大家可能覺得空泛，講件事實同大家分享下。中間break時，坐對家o既t先生同我講o左幾句真心話。佢話唔係第一次參加speed dating，之前約過女仔出街，覺得世途險惡，有d人係另有目的。我問，係咪對方有男友，佢話，有男友o既，約會時鬼崇，好易睇得出，預o左。佢所講o既「另有目的」，係指其他。

出得黎行，最緊要都提高警覺，otherwise囉唔返信心仲要hurt上加hurt，就勁蝕啦。佢o既經歷，似乎比起我遇過o個d披住玫瑰的男人更可怕。

活動提供：http://speedmate.com.hk